Shimti u Dr. Mukul Sangma kum u LO, u Bah Ronnie kum u Chief Whip ka Liang pyrshah

Syllad | The Rising MeghalayaAugust 29, 2024

U nongialam liang pyrshah ka TMC uba dei ruh u Myntri Rangbah barim ka Jylla u Dr Mukul Sangma u la ioh ia ka jingithuh kum u nongialam bathymmai ka Liang pyrshah (LO) hapoh ka Iingdorbar Thaw ain ka Jylla.

Katba u MLA ba marwei ka Seng Congress na Mylliem u Bah Ronnie V Lyngdoh u la ioh ia ka jingithuh kum u Chief Whip ka Liang pyrshah hapoh ka ïingdorbar thaw ain ka Jylla.

Ia kane ka rai jong u Lamphang ka Iingdorbar u Thomas A Sangma la pyntip da u Commissioner & Secretary ka Assembly lyngba ka jingpynbna ba la pynmih haka 29 tarik Nailar.

Kane ka la wan long ruh shi sngi hadien ba ka liang pyrshah TMC ka la kam na ka bynta ban shimti ia ka kam nongialam liang pyrshah lyngba ka jingkyrshan da u MLA Congress ba marwei na Mylliem.

Kane ka dei ka sien kaba ar ba u Dr Mukul Sangma u la shah thung kum u nongialam liang pyrshah.

Ka jingdonkam ban thung ia u nongialam liang pyrshah bathymmai ka la mih hadien ba ka Congress ka la sah satang uwei u MLA hadien ka jingleit pyniasoh ba dang shen jong ki laingut ki MLA ka Congress sha ka party synshar NPP. Kane ka jingkylla ha ka sain pyrthei ka la pynlong ia u Ronnie ba um don lad da kumwei pat hynrei iehnoh ia ka kam nongialam liang pyrshah.