Shimti u Justice Indra Prasanna Mukerji kum u Chief Justice bathymmai ka Meghalaya High Court

Syllad | The Rising MeghalayaOctober 3, 2024

U Justice Indra Prasanna Mukerji ha ka 3 tarik Risaw u la shim smai kum u Chief Justice bathymmai jong ka Iingbishar Meghalaya High Court.

La pyntian smai ia une u Chief Justice da u Lat ka Jylla u CH Vijayashankar ha ka jingialang kaba long ha Raj Bhavan Durbar Hall.

U Justice Mukerji u la shimti kum u Chief Justice hadien ka jingshongthait noh ba dang shen jong u Chief Justice S Vaidyanathan.

U Justice Mukerji u la pyndep ia ka jingpule ha St. Xavier’s School and College ha Calcutta, bad hadien pat u la ioh ia ka kyrdan LL.B. degree na ka University jong ka Calcutta bad na London University. La pynrung kyrteng ia u kum u nongiasaid ain ha u snem 1990. U la trei ia ka kam hapoh ka iingbishar Calcutta High Court.

Shuwa ban poi ha ka shuki nongbishar, u Justice Mukerji u la bat ia ki bynta ba kongsan kum u Senior Panel Counsel na ka bynta ka Sorkar India bad ka Damodar Valley Corporation. U la hikai ha NUJS, Kolkata, ha u snem 2005 bad u la long u dkhot ba trei shitom jong ki katto katne ki committee halor ki kam ain ba pawkhmat kaba kynthup ia ka I.L.R. Committee bad ka General Committee jong ka Bar Library Club.

Nalor kata u Justice Mukerji u la shah thung kum u nongbishar ka Calcutta High Court ha u bnai Jymmang 2009, bad ha ka 21 tarik Nailur 2024, u la thung kum u Chief Justice jong ka Iingbishar Meghalaya High Court.