Shitaiew ai por ka HYC ia ka NEIGRIHMS ban pyntreikam ia ka bhah thung kam Nurse

Syllad | The Rising MeghalayaMarch 25, 2025

Ka Hynniewtrep Youth Council (HYC) ha ka 24 tarik Lber ka la ai por hynniew sngi ia ki bor pyniaid ka North Eastern Indira Gandhi Regional Institute of Health & Medical Sciences (NEIGRIHMS) ba kin pynurlong ia ki saw tylli ki mat jingdawa kaba kynthup halor ka jingpynbeit ia ka thup lait kam da kaba mang 7.5% (8 seat) na ka bynta ki Scheduled Tribe (ST).

Ha ka shithi sha u Director ka NEIGRIHMS, ka HYC ka la kynnoh ba ka la don ka jingpynkhein ia ka polisi bhah kam na ka bynta ki ST bad ong ba tang ar seat na ki 107 tylli ki kam kiba lait na ka bynta ka post Nursing Officer la mang sha ki ST ha ka jaka jong ka bhah kaba dei ban long 7.5% na ka bynta ki ST, kata kaba dei ban long 8 seat.

Kumta na ka liang ka HYC ka la dawa ban pynkylla mardor ia ka thup lait kam da kaba mang 7.5% (8 seat) na ka bynta ki nongiakhun kam kiba dei ki ST kaba long katkum ka ain. Ka la dawa ruh ban pynthikna ia ka jingbud ryntih ka bhah kaba long da 80:20 ia ki kynthei bad shynrang kumba la leh da ka AIIMS lem bad kiwei pat ki jaka pule.

Nalor kata ka la dawa ruh ban thaw ia ki jaka pynlong eksam hapoh ka jylla Meghalaya khnang ban khanglad na kino kino ki jingbanbor bad ban pynthikna ia ka jingkhuid jingsuba bad ruh ban pynjlan ia ka rta jong ki nongiakhun namar ka ju long ki khep ba pynslem ia ka jingthung kam.

Ka HYC ka la kyntu ruh ban shim mardor ia ki sienjam ban pynbeit bad weng ia kine ki jingeh da kaba pynmih ia ka jingpynbna kaba la pynbeit thymmai hapoh ka 7 sngi, kata naduh mynta ka sngi bad lada ym lah ban leh ia kane, ka seng kan shim da ka lynti ban pynlong da ka jingiakhih paidbah.

Shuh shuh ka seng ka maham ruh da kaba ong, “Lada ia kine ki mat jingdawa ym lah ban pynurlong, ngin sa pynlong da ki jingiakhih bad ngin ym shim ia ka jingbahkhlieh lada mih kano kano ka jingjia.”

Kiwei pat ki mat ba la pynpaw da ka seng HYC ki kynthup halor ka jingkynnoh leh bym suitniew ia ki briew jong ka thain, ka jingbteng ban jied biang ia ki nurse shynrang na Rajasthan nalor kiwei kiwei.