Shitaiew ai por ka JSU ïaka GVK EMRI ban siew ïaka tulop kaba ot na ki nongtrei

Syllad | The Rising MeghalayaAugust 4, 2019

SHILLONG: Ka Jaintia Students’ Union (JSU) kala por shitaiew ïaka GVK EMRI ban siew ïaka tulop ki nongtrei 108 kaba kala ot tang na ka dawa ba ki ïakhih jong ki ban dawa na ka sorkar ban kyntiew tulop bad thung nongtrei da ki trai jylla.

Ka JSU kala kynnoh ba GVK EMRI kala knieh ïaka hok ki nongtrei jong ka 108 da kaba ot iaka tulop jong ki wat hadpeng ki jingeh kiba bun ba kine ki nongtrei ki ïakynduh.

Ka JSU ka dawa ruh na u myntri ka tnad ka koit ka khiah u Bah Alexander L Hek ba u dei ban tuklar halor kane ka jingeh ki nongtrei ka 108 bad um dei shuh ban sngap ia ki daw kaba ai daka GVK EMRI bad lada donkam ban weng noh ia kane ka company nangne ka jylla ka sorkar ka hap ban weng noh mardor khlem da buh por satia namar kane ka company ka lah pynkhein iaka rai jong ka tnad ka koit ka khiah ka jylla.

U President JSU Shillong Circle u Treiborlang R Suchen ba ki nongtrei 108 jong ka Assam ki iakhih pyrshah ia ka GVK ha jylla Assam, hynrei ym shym la don kata ka jingot iaka tulop na ki nongtrei bad hangne ha jylla Meghlaya pat kane ka company kala lehmon bad lehdonbor.

Ka JSU ka dawa ruh na ka sorkar ba kam dei shuh ban pynslem ban ai iaka kaiphod jong ka special committee kaba la dep ia shong ha ka 26 tarik jong u bnai Naitung hapoh ka ophis DHS. Ka JSU ka la dawa ruh na ka GVK ba kadei ban pyllait lut mardor hapoh shi taiew ia ka tulop ba lah dep ot na ki nongtrei108 bad lada kam lah ban pyllait ia kane ka tulop ba la dep ot ka seng kam banse ban tuklar hi noh dalade ban iarap ia ki nongtrei ka 108 kiba lah shah iuh roit ia ka hok kamai ka jong ki.

U Treiborlang R Suchen u la ong ruh bun ki samla ki duh jingkyrmen ban ioh kam ioh jam ha ka juk mynta bad kane ka jingleh jong ka GVK ka pynduh mynsiem shuh shuh ia ki samla ban wad kam ha kane ka juk bad kane ka ialam kylla ia ki samla sha ka lynti jingbakla ha ka jingim ka jong ki.

Ka jingleh ka GVK ban ot tulop bad transfer khah khah ia ki nongtrei khlem da buh por ka pawshai ba kadei ka jingiuh roit ia ka hok ki nongtrei, kumta ka JSU ka dawa na ka tnat labour ka sorkar ka dei ban leh eiei ia kane jingshah iuh roit ki nongtrei jong ka 108.