Shi taiew yn pyndep iaka tohkit halor ka jingphiel ka projek pynmih umphniang Shynrai Lakadong ha Laskein: Banteidor

Syllad | The Rising MeghalayaOctober 8, 2020

U Myntri jong ka kam rep kam riang ka Jylla, u Bah Banteidor Lyngdoh ula phah tohkit halor ka jingbym lah ban pyntreikam iaka kor pynmih umphniang bam/dawai na u shynrai Lakadong ha Laskein, Block, West Jaintia Hills District.

Kane ka kor pynmih umphniang na u Shynrai Lakadong ka don hajan ka ophis u BDO Laskein kaba pyniaid da ka Laskeiñ Federation of SHGs, hynrei namar ba kane ka kynhun SHGs kam nang ban pyntreikam iaka kor, kala shu sah khongreng la bun bun snem mynta.

Kane ka projek shna umphniang kala sdang naduh u snem 2011 bad la dep ban tei iaki iing ki sem bad buh ai ka kor ha u snem 2014.

“Nga la phah tohkit halor kane ka jingbym lah ban pyniaid shakhmat ia kane ka project bad ki daw bym lah ban pyntreikam iaka machine hapoh shitaiew,” la ong u Bah Banteidor uba la hiar jurip ia kane ka project dalade sha Laskein haka sngi Palei.

“U Shynrai Lakadong u dei uba mar ba pawnam bha ha kylleng ka ri bad kumjuh sha bar ri bad ka donkam bha ia ngi bad ka tnad kamrep kamriang ban kyntiew iaka jingrep Shynrai Lakadong ban kyntiew iaka ioh ka kot bad lad kamai jakpoh ki nongrep,” ong u Bah Banteidor.

“U Shynrai Lakadong u don iaka bor dawai kaba la tip kum ka curcumin kaba bun bad haba nujor bad kiwei jait Shynrai une u Shynrai Lakadong udei uba bha tam bad baroh baroh ki dawa ia une u Shynrai naduh ban pynlong dawai kynbat bad ban shet iaki jingbam, kumta ha kaba iadei bad kane ka kor pynmih umphniang ngin wad ki lad ki lynti ban pynkhie im ia kane ka project khnang ba ka jingthmu kin long kiba jop,” la ong u bah Banteidor Lyngdoh.

La wanrah ia kane ka projek ha Laskein da bun tylli ki bor kata naduh NEHU, MRDS, RRTC, Shillong and Techno Chemical Industries Ltd Calicut bad ka jingthmu kalong kaba bha, hynrei kala bijai ei kane ka projek namar ba ym don ba hikai iaka kynhun Laskeiñ Federation of SHGs haka rukom kaba dei ban ioh pynmih iaka umphniang.

Ha kane ka jingleit jurip u Myntri ka kam rep kamriang ladon ka jingialang kaba lyngkot bad laiadonlang ruh u MLA ka thain Mowkaiaw u ma Nujorki Sungoh, ka kong Teimonlang Shylla, Trinity Saioo kaba na Mulieh kaba la ioh ruh iaka Padma Shree kiba dei ki nongialam bad dkhot kane ka Laskeiñ Federation of SHGs.

Kiwei kiwei kiba iadonlang ha kane ka jingleit jurip u myntri kam rep kam riang ki kynthup ia u BDO Laskeiñ Block ma Brightstar Langbang, Director Horticulture kong S. Nongbet, Joint Director bah P. Kharnaior, ha ka jingiadonlang ka kong R. K Blah District Horticulture Officer Jowai, ma Markham Suchiang Gram Seveka, bah Commander Shangpliang President  Hill Farmers Union (HFU),  bah  Allfond Birth Kharsyntiew,  General Secretary (HFU).

Ka Trinity Saioo kala iathuh ba ia kane ka project la sdang tei naduh ki snem 2011 bad sdang pyntrei kam iaka ha u snem 2014 na ka bynta ban pynmih ia ka Umphiang na u shynrai Lakadong, kaba la dep pynbiang lut nadong shadong ia ka building bad ki tiar ki tar naduh ka um ban pynkhuid ia u shynrai, ki machine ot lyngkhit, machine ban shet pynryngkhiang, ki machine tyllait,  ka Machine shet ban pynkylla Umphniang bad kiwei de ki tiar pyndonkam, hynrei baroh kine la shu long leh noh ei namar ym don ba tip ban pyndonkam ia kitei ki Machine haduh mynta la hynriew tylli ki snem bad kumba long mynta kiba bun hi kitei ki tiar ym tip shuh la ki dang long ne em ban pyndonkam.