Shitom ka PHC Nongbah ong ka KSU

Syllad | The Rising MeghalayaSeptember 10, 2019

JOWAI: Ka Khasi Students Union (KSU), Jowai Circle hapoh ka jingialam u Morningstar Pasi bad u Phrakihowni Thubru president bad secretary KSU Jowai Circle haka jingïadonlang u president KSU Jaintia Hills Ohibait Dkhar bad kiwei kiwei ki dkhot kila leit ban ïakynduh ïa u Medical Health Officer incharge Nongbah PHC Dr. Luckystar Sungoh ban ia kren haka jingiadei bad ka jingeh bad ki jingduna kiba PHC ka ia kynduh ha kiba bun ki bynta.

Ka KSU haba la ïohlad ban ïakren bad u doctor kala lap ba wat la na kaliang ki doctor ki pyrshang ban pynbha ïaka jingshakri ka PHC kaba la don da ki phew phew snem ha katei ka shnong, hynrei dang bun bah ki tiar ki tar kiba kane ka jaka sumar ka dang donkam.

Kane ka kynthup ïaki tiar ban sumar ïa ki briew kiba don jingshitom bniat ha kaba u doktor kane ka jaka sumar u dang pyndonkam da ki shuki paidbah bad kane ka jaka sumar kam don iia kita ki shuki ne ki jingthiah kiba iadei bad ban sumar iaka jingpang bniat.

Kane ka jaka sumar kam biang ki dawai dashin na ka jingbun ki paidbah nongshim dawai na ki shnong ba marjan bad ki hap ban thied dawaina shabar.

Kane ka PHC ka don Doctor Ayurvedic, hynrei ka pharmacist Ayush pat kam don.

Nalor kata kane ka jaka sumar kam kam don ka um kaba biang ban pyndonkam ha kane ka jaka sumar kaba kadei kaba kongsan ba kino kino ki jaka sumar ki dei ban don ka um kaba khuid.

Kane ka PHC kala biang lut nadong shadong ki jingtei haba nujor bad kiwei kiwei ki PHC, hynrei ka donkam ïaka sorkar ban pynbiang iaki tiar ki tar bad baroh ki jingdonkam ka jaka ai jingsumar ba kan lah ban ai ka jingshakri kaba biang ia u paidbah.