Shna ïing ka FKJGP ia kawei ka longiing ha Bataw, synniang u MLA bad MDC ka thain 60 hajar

Syllad | The Rising MeghalayaNovember 20, 2020

Ka Federation of Khasi Jaintia and Garo People (FKJGP), Bataw Unit kala shna iing ia kawei ka longkmie haka shnong Bataw, East Jaintia Hills District.

Ia kane ka iing la aiti bad plie paidbah iaka haka sngi Thohdieng da u MLA Khliehriat uba long ruh u myntri sorkar u ma Kyrmen Shylla.

Kane ka iing kaba la shna ka FKJGP Bataw Unit ka dei ka jong ka kong Airis Masa 60 snem rta na ka Shnong Bataw kaba don ïa uwei u khun shynrang ba 21 snem rta uba don haka jingduna haka dkhot met bad kane ka longkmie kadei kaba im bylla sngi.

Ïa kane ka ïing la shna haka jinglut kaba 2 lak 30 hajar tyngka. La shna ia kane ka iing da kaba synniang para dkhot bad la synniang ruh da u MLA ka thain T.50 hajar bad u MDC ka thaiñ u Dr Sankey Shangpung u la synniang T.10 hajar.

U DH Sumer General Secretary FKJGP, East Jaintia Hills District Unit ula ïathuh ïa kane ka rai ban shna iing la shim hadien ba la iohi iaka jingeh ki shi kmie shi khun. Ula ong ka Kong Airis haka jinglong kynthei ban pyndap iaka jingdonkam ka jong ka bad u khun ba don jingduna ka shem jingeh bha nalor ba ka shongwai ha iing briew bad dei halor kane la shim iaka sien jam ban iarap shna iing iaka.

U Bah Kyrmen Shylla ula ai ka jingïaroh iaka FKJGP Bataw Unit kaba tynrong halade iaka jingkitkhlieh ban shna iing ia kane ka longkmie kaba long ka nuksa kaba kiwei pat ki seng ki synjuk ki dei ban bud ban iarap bad ban don kata ka mynsiem ban ai.

Ula kitbok kitrwiang ïa kane ka longïing ba kan ïoh ka met ba koit ba khiah bad ha kajuh ka por ula kyntu ïaki dkhot ka FKJGP ban nangïai bteng ïa kane ka kam ba bha jong ki na ka bynta ki longïing ba duk.

Ka kong Airis Masa ka la pynpaw ka jingkmen kaba ym lah shuh ban batai hadien ba ka FKJGP ka la wad ki lad ki lynti nangne nangtai ban ïarap pynshna ïaka da ka ïing kaba paka.

Kiwei de kiba la ai jingkren ha kane ka sngi ki long u MDC ka thaiñ u Dr Sankey Shangpung, u Bah Dundee Cliff Khongsit General Secretary FKJGP Central Body, u K. Nongphlang Chief Organising Secretary FKJGP Central Body, u Tuesday Lytep president FKJGP WJH bad kiwei.

Ha kane ka juh ka sngi ka Dorbar Shnong Bataw ka aiti ruh ïaka dorkhat ha u Bah Kyrmen Shylla ban wanrah ïaki jingroi jingpar hapoh ka Shnong Bataw kum ban maramot bad pynthymmai ha ka rukom ba itynnad ïaka Community Hall bad ka Compound, ban shna iaka Gallery shong peitkai haka madan phutbol kaba don ha madan Lachieh, ban buh iaki street light hapoh ka shnong ban kham lait na ki jingma bad jingsniew ba har rukom bad ban shna iaka Aqua Park ha Umsyngki Bataw.

Ha kane ka juh ka sngi u Dundee Cliff Khongsit  ula pynskhem ïaki nongkitkam jong ka FKJGP-South Eastern Border Area Circle ba kynthup ïa u President-Mathew Pajat, Vice President-Ebran Suchen, General Secretary-Eladmi Suchen, Assistant.Secretary-Kymmo Patwat, Organising Secretary-Alwin Suchen, Assustant Organising Secretary-Lamchwa Dong, Information Secretary-Dunilangki Suchen, Education-Secretary-Heibor Suchen, Sports Secretary-Banshanbor Ksih, Assistant Sports Secretary-Pyndap Lyngdoh, Discipline Secretary-Ampli Rupsi, Assistant Discipline Secretary Ewanmi Rymbai.