Shna pyndep iaki jingtei ba dangsah haka surok bah NH 6 ong ka shnong Wapungskur iaka company

Syllad | The Rising MeghalayaMay 27, 2022

Ka Dorbar Shnong Wapungskur, East Jaiñtia Hills kala dawa ban shna mardor iaka surok bah National Highway 6 kaba iaid lyngba ka snong Wapung kaba la sahteng ne sahkut haduh mynta.

Ki nongialam jong ka Dorbar Shnong Wapungskur hapoh ka jingialam jong u Ma Deolangki Dkhar Waheh Shnong kila ai da ka dorkhat sha ka company ba pyntrei ia kane ka surok, ka GR Infra Projects Ltd.

Ka dorbar shnong ha ka dorkhat kaba kala ai sha ka company kala dawa ban maramot pynbha ia ki bynta ba shlei um hapdeng surok, ban shna pyndep ia ki ki nala um (side drains) ba dangsah, ki lynti iaid kjat (footpaths), ki guard wall, ki traffic lights bad signals, ki rumble strips bad kiwei kiwei ban shngain ka iaid ka ieng ha surok.

“Kiba bun ki bynta jong ka surok bah NH-6 ba hap hapoh jong ka shnong Wapungskur kiba shait dap um smam hapdeng surok ha ka por lyuir bad ruh tuid (um) shapoh ki baranda iing briew bad sha ki jaka bym dei ban tuid um na ka daw jong ka jingbym biang bad set ki nala um kiba la dep shna ha kane surok kaba la wanrah jingeh iaki nongshong shnong” la ong u waheh shnong.

Ula ong ban shngain ka iaid ka ieng ki khynnah skul, ka shnong kala dawa ban buh iaki rumble strips ha ki artylli ki jaka ha khmat ka Step By Step Secondary School Wapung bad ka K.B Memorial Secondary School Wapung.

Shuh shuh la kyntu ia ki bor ba dei peit ban maramot pynbha ia ki traffic lights bad ban shna pyndep ia ki jaka iaid kjat bad ki guard wall na ka bynta ka jingshngaiñ bad ka jingmyntoi u paidbah.