Shna surok thymmai ka Assam ha Mukroh, kyntu ka bor shnong iaka bor District West Jaintia Hills ban pynsangeh

Syllad | The Rising MeghalayaNovember 19, 2024

U Waheh Shnong jong ka Dorbar Shnong Mukroh u ma Kitlang Maskut ula kynnoh ba ka sorkar Assam ka la iai bteng ban kyntur sha u pud u ang ka shnong Mukroh, kaba hap hap Laskein C&RD Block, West Jaintia Hills District da kaba shna ia ka surok thymmai na ka kyntoit Salang sha kyntoit Umlaphiah.

U Ma Kitlang ula pynpaw ia kane haba shim bynta ban pynsngew iaki jingeh jong ki, haka jingialang General Executive Committee jong ka Synjuk Waheh Shnong Ri Jaintia (SWRJ) ha Mihmyntdu haka 19 tarik Naiwieng.

Ula iathuh ba ia kane ka surok thymmai la shna da ka Sorkar Assam ne da ka Karbi Anglong Autonomous Council (KAAC) ka iaid lyngba ka Assam Forest Beat House kaba dang hap u pud u sam jong ka Dorbar shnong Mukroh bad ka Assam ka sdang ban pynshna ia kane ka surok ha ki taiew ba khatduh jong u bnai Nailur jong une u snem.

Ki nongshong shnong bad ka Dorbar Shnong Mukroh kila pynpaw ka jingpyrshah halor katei jingkyntur pud da ka Assam namar kiba bun bah ki jaka rep jong ki nongshong shnong jong ka Mukroh kin shah knieh lut, ula ong.

Ula kynnoh ruh ba ki briew sorkar jong ka Assam kila bteng ban pyndik iaki nongshong shnong kiba leit rep leit riang bad ha man ba ki nongrep ki kit ia u khaw u kba khamtam iaka dieng iap ban thang ding kumjuh ban shna iing. Ula ong ruh ba ki shah khanglad bad ki shah dain kuna haki Assam Forest kiba buh ktem hapoh u pud u sam ka shnong Mukroh.

Halor kine ki jingeh baroh, u Ma Kitlang ula iathuh ba ka Dorbar shnong kala dep ban pyntip mardor sha ka bor pyniaid District West Jaintia Hills kumjuh sha u CEM jong ka Jaintia Hills Autonomous District Council (JHADC) bad la kyrpad iaki ban pynsangeh noh ïaka jingshna ïa kane ka surok thymmai.

Ula iathuh ruh ba ka Dorbar Shnong kala kyntu ruh iaki bor pyniaid District ban buh iaki pulit Meghalaya hajan ka Assam Forest Beat House na ka bynta ban pynthikna iaka jingshngain jong ki nongshong shnong ha ka por ba kit ïa u khaw bad kumjuh ruh ban shimkhia ban iakren bad ka Sorkar Assam ban ym pyndih haba kit iaki dieng thang ding.