Shoh dohkha ki suba Bangladesh, iap pathar ki dohkha ha Wah Apha Umkiang

Syllad | The Rising MeghalayaSeptember 21, 2024

Ka jingshoh dohkha ki riew rhah kala wanrah ka jingiap pathar ki dohkha ha ka wah Apha, kaba don haka shnong Umkiang, East Jaintia Hills District.

Kane ka jingjia shoh dohkha kala jia ha kine ki khyndiat sngi bad lalap dien haka 20 tarik na ki bitor dawai bih kiba ieh harud wah da ki runar kiba leh ia kane ka kam.

Ki nongialam bad dkhot ka Eastern Narpuh Border Fishing Association (ENBFA) hadien bala ioh jingtip ia kane kila hiar sha katei ka wah haka 21 tarik Nailur bad kila lap ba ki dohkha kila iap pathar ha ki bynta ka thwei Wah Thlem ter ter shaduh sha khappud Bangladesh.

U president ka Eastern Narpuh Border Fishing Association (ENBFA), u ma Fin Surong, ula pynrem jur ia kane ka jingleh ki riew runar ban pyniap pathar ia ki dohum dohpnat bad pynjot ia kane ka wah kala wanrah ka jingsma kaba jur.

Ula ong ruh ba kine ki riew shim kabu la suba jur dei ki nong Bangladesh namar ba ki dawai ki dei kiba don iaki dak Bangla.

Ka jingleh kine ki runar kala pynduh mynsiem ia ki kum ka seng ba sumar iaka wah, hynrei ula ong ruh ba kin buddien iaki runar ban pynshitom ia kine ki briew.

Hapdeng kane ka jingjia, une u nongialam ula kyntu ruh bad ai mynsiem ia ki nongshong shnong ban ym duh jingkyrmen, hynrei ban treishitom shuh shuh ban iada iaka wah bad ban long kiba husiar bad peitngor ia ki riew shim kabu kiba thmu ban pynjot iaka wah.