Shoh dusmon bad lute ki suba nong Bangladesh ïaki 3 ngut, mynsaw jur uwei ha Lad Darrang

DAWKI: Lai ngut ki briew kila shah thombor bad shah shoh dusmon ha ki runar kiba ym lah satia ban ithuh bad suba jur ba ki dei nong Bangladesh.

Kane ka jingjia kala jia hynnin ka miet sngi Saitjain haka por kumba 8:30-9 PM ha surok bah Dawki Amlarem Jowai ha lad ban leit sha ka shnong Darrang.

La iathuh ba kane ka kynhun jong kine ki runar kiba don kumba 12 ngut eiei kila pakhang lynti ïaka kali alto 800 ML04B 9156 bad bom tied ïaka kali bad iaki briew la shoh la bom da ki tiar pynmynsaw haduh ba kila jem jai bad mynsaw jur.

Kine ki lai ngut kiba mynsaw ki dei kiba la tip kyrteng kum u Tynshain Khonglah, Malui Khonglah bad u Anu Khonglah. U Tynshain ula mynsaw jur bad la kit ïa u sha ki jaka sumar sha sor Shillong katba arngut ki la ïoh ka jingsumar ha Dawki PHC.

La iathuh ba ka jingshlur jong ki suba nong Bangladesh ban wan leh ki kam pyntriem ha ki shnong khappud ka dei namar ba tlot palat ka jingpahara iaki khappud na ki shipai BSF. Naka por sha ka por ki briew kiba lui lui ki shah thombor bad shah lute haki lynti syngkieng ha shilynter ki shnong khappud naduh na Dawki haduh ki thain Muktapur.