Shongkun ka Dorbar ki Soo Langdoh ha madan Lariang Ialong; pynbna iaki tarik Behdienkhlam

Syllad | The Rising MeghalayaDecember 16, 2024

Ka Dorbar ki Soo Langdoh ha madan Lariang, Ialong kadei kawei naki Dorbar ba kyrpang jong ki shakri niam hapoh ki Soo Raij – Soo Langdoh kaba khlieh da u Dolloi Elaka Jowai katkum ka rukom kala long haka 15 tarik Nohprah.

Ha kane ka Dorbar, ki Soo Langdoh kila pynbna iaki sngi ki taiew jong ka shad Ñiam Behdieñkhlam jong u snem 2025. Ha Raij Chyrmang ka shad Ñiam Behdeiñkhlam kan long haka 1 tarik Jymmang, ha Raij Jwai ka sngi pynkut iaka Shad Ñiam Behdieñkhlam kan long haka 14 tarik Naitung, ha Raij Tuber ka sngi pynkut iaka Chad Niam Behdeinkhlam kan long haka 22 Naitung katba ha Raij Ialong ka sngi pynkut iaka shad Ñiam behdieñkhlam kan long haka 7 traik Nailar 2025.

La wan shimbynta da ki shakri niam jong ki Soo Raij – Soo Langdoh, ki nongialam jong ki Seinraij ba kynthup naduh u Ma OH Toi President Seinraij Jwai, Ma Pyrkhat Shylla President Seinraij Ialong, Ma Ker Lakiang General Secretary Seinraij Chyrmang bad Ma H. Phawa Seinraij Tuber nalor ki longkmie longkpa bad ki samla haka jingialang kaba la pyniaid da u Pator ka Raij Jwai Rangbah Raymand Nartiang.

U Dolloi ka Elaka Jwai Rangbah Puramon Kynjing u pynpaw ba u dap da ka jingsngewnguh iaki Soo Langdoh kiba la trei shitom ha ka ban pyndep iaki kam niam hala ki jong ki jong ki Raij ki shnong na ka bynta ban bit ban biang ka shnong ka Raij ha baroh ki liang.

Ha kajuh ka por u khot wer iaki Kur kiba don bynta haki kam niam haki Raij ban pynmih iaki Kni bad longkmie ban kit ban bah iaka lynkor jong ka jingshakri niam hapoh ki Raij ki shnong khnang ban im ban neh ka niam ka rukom, dustur, riti pateng la pateng.

Kaba kham kyrpang shuh shuh ha kane ka Dorbar da ka jingdon ka suit ka shor bad nguhblei nguhsyiem ki Soo Langdoh ryngkat bad u Dolloi bad ki riew Rangbah.

La ioh ruh ki jingkren jingbatai halor ki phang bapher bapher ha kaba u Myown Chyrmang Kni ka Raij Jowai ula kren halor ka phang “I kam Dong”. U Jadeja Dkhar Maji ka Raij Tuber ula kren halor ka phang “I kitkhia ya ki kam niam, iow suk u saiñ ka Raij ka Chnong”. U Pyrkhat Shylla President Seinraij Tuber ula kren halor ka phang “I kreh bha ki nongkrehniam ku ka niam ka rukom” katba u Ker Lakiang General Secretary Seinraij Chyrmang ula kren halor ka phang “I dor wa ka nongrim ka yutang kñia pyrthat”.

Shwa ban poi shaba kut jong ka Dorbar, u Dolloi kum u khlieh ka niam khlieh ka Elaka ula pynsngew hakhmat ka dorbar iaka dustur riti jied Langdoh bad Pynkyntang Langdoh ha kaba da kawei ka sur jong uba bun balang la rai ba ki Soo Langdoh-Soo Raij kidei ban iakren iaphylliew jingmut sani bha ia kane ka bynta hala ki jong ki jong ki shnong ki raij khnang ba kano kano ka jingthoh ka ban phah sha ka JHADC na ka bynta ban pynrung hapoh ka Customary Law kan long kaba la biang khnang ban lait ka pateng na ka jingkulmar bad kutlad.