Shongkun ka jingiaid Proseshon Iukharist ka Jowai Parish

Syllad | The Rising MeghalayaDecember 8, 2024

Ki paid riew ngeit ka Balang Catholic ki la wan iashim bynta shitrhem haka Proseshon Iukharis ba la pynlong shisien shisnem da ka Parish Jowai haka Sngi U Blei ha madan Marian Hill, Jowai.

Shwa ka jingiaid Proseshon, la pynlong iaka jingknia Mass Iukharist Bakhuid kaba la pyndep da u Most. Rev. Ferdinand Dkhar DD, Bishop ka Jowai Diocese ha ryngkat ka jingsynran lang ki Lyngdoh sohblei napoh ka Diocese kiba kynthup ia u Rev. Fr. Hilarius Lamare, Rev.Fr. Simeon Sungoh, Rev.Fr. Martin Shylla, Rev.Fr. Lawrence Paswet, Rev.Fr. Manbha Pakem, Rev. Fr. Crecenroy Laloo, Bro. Rangdabiang Lyngdoh, Bro. Hastborn Lyngdoh, bad kiwei kiwei.

Ha kane sngi la don haduh 80 ngut ki khynnah rit shynrang bad khynthei kiba pdiang ia ka Kommunion Bakhuid ha ka sien ba nyngkong bad 50 ngut ki samla shynrang bad kynthei kiba ioh pdiang ia ka Sakrament Jingpynskhem.

U Bishop Ferdinand Dkhar haba sam iaka khubor na ka ktien U Blei ula ong kane ka dei ka Aiom jingpynkhreh (Advent) na ka bynta ka jingkynmaw ïaka jingwan long briew jong U Jisu, U khun jong U Blei sha kane ka pyrthei ban pynim ïa ki khun bynriew.

Lyngba kane ka khubor u Bishop ula khot wer ia iwei pa iwei ki riewngeit ban long kiba la pynkhreh ïalade ban pdiang ia U Jisu, ym ban pdiang da ka jingkmen kaba tang shipor, hynrei da ka jingkmen kaba neh junom.

Ha ka nohphai sngi, ki riew ngeit ki la shim bynta haka jingiaid proseshon ryngkat ki jingrwai jingduwai ban iaroh ia U Blei ha baroh shilynter ka jingiaid proseshon kaba sdang na madan Marianhill, Iawmusiang, Mission Compound, Iongpiah, Dulong, Tpep Pale bad wan phai biang sha madan Marianhill.

Ha shwa ban pynwai, la ioh ka jingkyrkhu Sakrament bakhuid tam ka Duwan na u Bishop Ferdinand Dkhar bad la ioh ruh ia ka jingkren shaphang ka jingkhraw jong ka Iukharist bakhuid.