Shongkun ka jingrakhe ia ka lyngkhuh snem ba 186 ka sngi khlad u Syiem Tirot Sing

Syllad | The Rising MeghalayaJuly 17, 2021

Ka jingrakhe ia ka lyngkhuh sngi iap kaba 186 snem u Syiem Tirot Sing Syiem, Syiem ka Hima Nongkhlaw, la lah ban rakhe bad ban pyndon burom ia ka, hapdeng ka jingiphuh iphieng, ha kylleng ka jylla, khamtam ka kane ka bri u Hynñiewtrep.

Ka jingrakhe kaba kham shongkun bad kaba iphuh iphieng bha ka la long ha Mairang, ha kaba u lam phang ka  iing dorbar thawain ba dei artad u MLA ka thain u bah Metbah Lyngdoh, u la plie paidbah  ia u mot dur ba shi rynieng jong u Syiem Tirot Sing.

Ia une u mot dur I Syiem Tirot Sing la lah ban shna ia ka mynba u bah Metbah u dang bat ia ka shuki kum u myntri ba dei khmih ia ka tnat tourism, kaba la sdang ban pynurlong ia kane ka jingthmu naduh u snem 2017-2019.

Ha kane ka sngi plie ia une u motdur  ba shi rynieng, nalor u bah Metbah Lyngdoh, la sakhi lang ruh Hima da u Pa’eim  P M Syiemlieh, u bah u bah A Nongbri  SDO Mairang Civil Sub Division, uba la pynpw ba mynta ka snem kane ka jingrakhe pyndon burom ka long kaba kham shong kun ne shongkhia namar ba ka sorkar kmie ka la sdang ba kan shim ia ka sien jam ban rakhe pyndon burom kham kyrpang ia baroh ki khla wait nongialeh laitluid ka ri, kaba long kum ka dak ban rakhe pyndon burom ia ka lyngkhuh dap snem ba 75 snem ka jingioh laitluid jong ka ri.

Na Mairang, ka jingrakhe ka la pur ne par kylleng ka bri Hynñiewtrep, ha kaba ki Sengbhalang bapher bapher ki la shim ia la ki jong ki bynta ki jong ki ban rakhe pyndon burom ia kum kane ka sngi, ha kaba ka dak jong ka jingrakhe ka long ban buh ia ki syntiew ki skud ha ki mot dur ne ki mot sah kynmmaw ba la tei ha ka nam bad ka burom ka jong u Syiem Tirot Sing.

Ym lah ban klet ba ka jingrakhe ia kane ka sngi mynta ka snem ka long kaba kham pher haba ia nujor bad kiwei pat ki snem ba la leit noh, namar ba ka jylla hi baroh kawei ka dang iai don hapdeng ki har rukom ki jingpyrkhing, kaba long kum shi bynta ban iada na ka jingwan ban saphriang biang ha ka sien kaba ar ka jingpang ba jur bha ka jingiabit hapdeng para briew ka coronavirus.

Da kumta, kiba bun na ki prokram jingrakhe ka long tang da ki khmat nongialam kiba kham hakhmat.

Wat la katta ruh ka jingrakhe ka long kaba rit, hynrei ha ka dohnud bad ka mynsiem uba bun balang, ha kum kane ka sngi, ka shlei bad dap katta ka mynsiem, ban kynmmaw tympang ia ki kyntien jong une u syiem ba khraw, kaba haduh ka sngi kaba khatduh, u pha ia la ka jong ka jingim.

Ha Shillong ka tnad Arts and Culture kala kynmaw burom ia ka sngi khlad u Tirot Sing Syiem bad haka juh ka por kane kalong ruh kum shibynta ban rakhe iaka “Azadi ka Amrut Mahotsav”, ban rakhe iaka jingioh laitluid 75 snem ka ri India.

U Bah FR Kharkongor, IAS, Commissioner and Secretary ka tnad Arts and Culture ka Jylla haba kren ula pynkynmaw iaka jinglen lade U Tirot Sing bad kiwei ki nongialeh laitluid haka Thma Anglo Khasi. Ula ong ba ka jingdon jong kine ki khla wait iaka mynsiem ieid ri bad jaidbynriew naduh U Tirot Sing bad kiwei kum u Kiang Nangbah bad Pa Togan Sangma kala long ka bynta jong ka jingialeh na ka bynta ka jaidbynriew kaba la sah khana bad lam lynti sha ka jingialeh laitluid ka ri kaba la tip kum Indian National Movement.

U Bah Kharkongor ula kyntu ban phai sha ka history U Tirot Sing, bad kyntu iaki samla pule ban wad bniah shuh shuh shaphang une u khlawait ka ri ba ban jingthoh ban sah khana katkum ka juk stad mynta kaba la tip kum ka digital repository ban sngewthuh ha baroh ki liang shaphang u Tirot Sing.

Shuh shuh U Myntri ka tnad kam khlaw ruh ula leit ban buh syntiew ha u mot sah nam U Tirot Sing ha Fire Brigade, Shillong.

Haba phai biang sha ki prokram jingrakhe, naka liang ki nongialam ka seng kmie ka Khasi Student Union, hapoh ka jingialam u President u jong ka u samla Wanbokstarwell Marngar, ki la pynlong da ka jingleit ban buh syntiew ha u mot ba la shna kyrpang ia u Syiem Tirot Sing ha Madan Iew Rynghep (Fire-Brigade), Shillong.

Sa kawei ka kynhun sengbhalang ka Hynniewtrep Youth Council, ki la ia snoh kti lang shi kynhun d akaba ki nongialam ba hakhmat ka seng  ba kynthup ia ki nongialam napoh West Khasi Hills, ka North West Khasi Hills ryngkat ka shnat treikam jong ki kynthei (women’s wing), ki la hiar ban pyndon burom kyrpang ia kane ka sngi hapoh Mairang da kaba ki la leit ban buh syntiew bad ban pynlong ia ka jingsngap jar, ka dak ban kynmaw burom ban bynrap da ka jingialang kaba lyngkot, ha kaba la ioh ia ki jingkren na ki nongialam ba hakhmat.