Shongkun ka jingrakhe ia ka Republic Day kaba 76 ha East Jaintia HIlls

Syllad | The Rising MeghalayaJanuary 27, 2025

Ha ryngkat ka Ri baroh kawei, ka East Jaintia Hills District ha ka 26 tarik Kyllalyngot ka la rakhe ia ka Republic Day kaba 76 jong ka Ri ha ka jingialang kaba ka long ha madan jong ka skul Higher Secondary ha Khliehriat ha ka jingiadon lang u Myntri sorkar Jylla u Bah Kyrmen Shylla kum u Kongsan uba la wan ban pyher ia ka lama jong ka Ri.

Ki la don haduh khyndai tylli ki kynhun kiba la iashim bynta ha ka jingiaid parade kaba kynthup ia ki bor pulit ka District, na ka Civil Defence & Home Guards bad ki khynnah skul.

Hadien ka jingiaid parade la pynbud ruh da ka jingpyni ia ki jingshna dur ne tableau ba la pynkhreh da ki tnad bapher bapher kiba pyni ia ki skhim bad ki prokram jong ki bad kumjuh ruh ia ki tiar kiba iadei bad ka kolshor  ia kiba la pyni da ki samla pule jong ka district.

Ha kane ka prokram la wan iashim bynta shitrhem da ki ophisar na ki Tnad bapher bapher, ki samla pule bad ki paidbah nongshong shnong.

Ha kane ka sngi la sakhi ruh ka jingsam ia ki khusnam sha ki nongjop ha ka jingiakop March Past ha kaba ka JNV Rymbai (Boys) ka la ioh ban rah ia ka nam ladhuh, katba ka JNV Rymbai (Girls) bad ka Ambrose Memorial Secondary School, Khliehriat ki la ioh ia ka kyrdan kaba ar bad ba lai.

Nalor kata la sam ruh ia ki khusnam sha ki jongjop ha ka jingiakop pyni ia ki tiar halor ka kolshor ha kaba ka Dorbar Shnong Tuber Kmai Shnong ka la ioh ia ka nam lahduh, katba ka KB Memorial Secondary School, Wapung ka la wan ha ka kyrdan kaba ar bad bud sa ka Biate Cultural Troupe.

Ha kane ka prokram la ioh ruh ban sam ia ki khusnam sha ki nongjop ha ka jingpyni ia ki tableau ha kaba ka tableau jong ka District Horticulture and Agriculture Office, East Jaintia Hills District ka la jop ha ka kyrdan kaba nyngkong bud sa ka District Commerce & Industries Centre (DCIC), Khliehriat bad ka Soil & Water Conservation Department respectively.

Shuh shuh ka la don ruh ka jingai sngewbha sha ki khynnah kiba don ha ki jaka ri khynnah ha Khliehriat bad 7Tyndai Child Care Counselling Centre, Tuber Kmaishnong.