Shongkun ka jingrakhe lyngkhuh shi snem jong ka Eastern West Khasi Hills District 

Syllad | The Rising MeghalayaNovember 10, 2022

Ka Eastern West Khasi Hills District hynne ka sngi ka la ioh ban rakhe ia ka jingdap shisnem ka jong ka ha ka prokram ba la pynlong ha Madan Mot Tirot, Mairang Mission , Mairang ha kaba u Lamphang ka Iing Dorbar Thaw Ain ka jylla, u Bah Metbah Lyngdoh u la leit kum u kongsan ha ryngkat ka jingsynran lang u myntri ka tnat Water Resources ka jylla, u Bah Brolding Nongsiej uba la leit kum u symbud kongsan.

Kiwei kiwei pat kiba la iadon ryngkat ha kane ka sngi ki kynthup ia u MDC ka Mairang-Nongkhlaw, u Bah Batskhem Ryntathiang, u MDC ka Pariong-Mawthadraishan, u Bah Jambor War, u Syiem ka Hima Nongkhlaw, u Pa’iem P.M Syiemlieh, u Syiem ka Hima Myriaw, u Pa’iem K. Syiem, u Syiem ka Hima Mawiang, u Pa’iem N. Syiem, u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka District, u Bah M.B Syiem, ki ophisar jong ki tnat bapher bapher jong ka sorkar jylla, ki nongialam shnong, ki dkhot Seng Treilang (SHG) bad ki paidbah ka thain. 

Ha ka jingkren ka jong u, u kongsan, u Lamphang ka Iing Dorbar Thaw Ain ka jylla, u Bah Metbah Lyngdoh, haba pynpaw ia ka jingsngewkmen ka jong u ban ioh iashimbynta bad ka jingrakhe ia ka jingdap shisnem jong ka distrik, u la ong ba ka jingioh distrik ka la long kaba seisoh namar jong ka jingkyrshan markylliang bad ka jingiatreilang da baroh ki paidbah nongshongshnong bad u la ong shuhshuh ba ka jingrakhe ia ka jingdap shisnem jong ka Eastern West Khasi Hills District ka pynioh ia ka lad ka kabu ban kynmaw ia ka jingtreishitom jong kito baroh kiba la pynurlong ia ka jingangnud ki paidbah ka thain ban ioh iala ka distrik ia kaba la plié ha ka 10 tarik u Naiwieng jong u snem 2021.

U Bah Metbah u la ong ruh ba ka jingthaw ia ki distrik kiba thymmai ka long da ka jingthmu ban pynjan shuhshuh ia ka synshar khadar sha ki paidbah nongshongshnong bad u la pynpaw ruh ia ka jingkyrmen ban iohi ia ka jingkyntiew kyrdan jong ki ophis bapher bapher kiba don ha ka distrik ha ki por bad ki snem ban wan.

Haba kren halor ka jingshakri ba shitrhem jong ki nongtrei jong ki tnat treikam kiba pher bapher kiba don hapoh ka distrik, u Lamphang u la kyntu ia ki ba kin kham trei shitom shuhshuh ha ka jingshakri jongki ia ki paidbah jong ka distrik ha ki snem ban bud.

Ha ka jingkren ka jong u, u Lamphang u la kyntu ia baroh kiba la sakhi lang ia ka prokram ba kin shim ia ka jingkitkhlieh ban kyntiew kham shajrong ia ka distrik da kaba buhthong ruh ban pynlong ia ka kum ka ‘Model District’ ia kaba kiwei pat kin kwah pyrthuh bud.

Ha kane ka sngi, u kongsan u la ioh ruh ban plié ia kiba bun ki projek shna surok bad u la pyllait ruh ia ka kot lyngkdop ha kaba la thoh ia ka jingiaid lynti jong ka distrik ha ki liang bapher bapher lyngba ka shisnem ba la leit noh naduh ba la plie ia ka ha ka 10 tarik u Naiwieng jong u snem 2021.

La pynphuh pynphieng shuhshuh ia kane ka jingrakhe da ki jingrwai bad jingshad na ki riewdonsap ka thain.           

Lah ban pynkynmaw hangne ba ia ka Eastern West Khasi Hills District la ioh ban pynbna kum ka distrik kaba 12 jong ka jylla Meghalaya da u Myntri Rangbah ka Jylla, u Conrad K sangma ha ryngkat ka jingiadonlang kiwei de ki kynrem ki lyndan ha ka prokram kaba ishongkun ba la pynlong ha Madan Tiehpdang, Pyndengumiong, Mairang ha ka 10 tarik u Naiwieng mynshem snem. (SDPRO, Mairang)