Shongkun ka jingrakhe lyngkhuh snem ba 132 ka Balang Unitarian

Syllad | The Rising MeghalayaSeptember 18, 2019

JOWAI: Ka jingrakhe pyndonburom ïaka lyngkhuh snem ba 132 snem ka Balang Unitarian ha Jowai kala long kaba shongkun ha kaba ki riewngeit ka Balang naduh ka por mynstep haduh janmiet kila shim bynta shitrhem ban leit jingïaseng.

Ka Balang Unitarian Jowai ryngkat bad kiwei pat ki Balang Unitarian ha ri Khasi, Jaiñtia, Ri Bhoi bad Karbi Anglong kala rakhe pyndonburom ïaka lyngkhuh snem jong ka Balang. Ïa kane ka Balang la seng da u Babu Hajom Kissor Singh Lyndoh Nongbri hapoh ka shnong Jowai, ha ka 18th Nailur, 1887.

Kumba ju leh manla u snem; la rakhe ïaka sngi kyrpang ka Balang naduh ka por mynstep da ka jingpynher ïaka lama lyngkhuh snem da u Ma Rihiwot Niangti bad ka jingbuh syntiew ïa u mot u Babu H.K Singh Lyngdoh Nongbri, uba don ha phyllaw ka ïing mane da ka kong Kmenlang Pakma.

Haka jingïaseng haka por shiteng sngi kaba la pynïaid da u Marki Passah bad ïaka khubor la sam da u Rev. Sowat Laloo halor ka phang “Bat la ka jingngeit, bat da ka jingkmen”.

U Rev. Sowat Laloo haba kren ula ong ba por anniversary kadei ka por phai dien bad ban kynmaw burom ïaki nongseng jong ka balang kiba la leh shitom ban pynskhem ïaka niam bad ka jingmyntoi ki pateng ban wan.

Ula ong ba ha ka Balang Unitarian la hikai ïa ngi ban ngeit tang ha uwei U Blei. “Kum ki riewngeit ka Balang ki bat ïaka soskular jong ka balang ban pynskhem ïaka jingngeit bad ban long kiba kylluid ka mynsiem bad ban shakri ïaki para briew bad ban synniang sha ka balang bad ka imlang ka sahlang ban roi ka par.”

U Pastor ula ong ba ngi don la ka jong ka jong ka jingngeit, kum ki briew dei ban burom kawei ïaka kawei ka jingeit bad ban pynduh iaka jingsngewpher niam.

Haka nohphaisngi pat shuwa ban sdang ka jingïasengmiet la don ka jingïaid rah dongmusa kaba i shongkun kaba la ïashimbynta da ki riewngeit ka Balang Unitarian lyngba ka Chutwakhu, Panaliar, Dulong, Tpep-Pale, Iawmusiang bad la pynkut ha  ïingmane ka Blang Unitarian Jowai