Shongkun ka lehniam Chad Tyllu ha shnong Mynso

Syllad | The Rising MeghalayaApril 1, 2024

Ka lehniam Chad Tyllu kadei ka lehniam ne ka rukom dustur ba la pynlong ha Raij Mynso shisien shisnem shwa ban sdang iaka rep ka riang jong ki khun ka Shnong ka raij haki hali ki pynthor.

Ha une u snem iaka lehniam la pyndep haka 1 tarik Iaiong haka jingsakhi lang u President ka Seinraij Jowai Ma OH Toi kum u kongsan, u Ma K Myrchiang Doloi Elaka Mynso, ki riew rangbah ka niamtre na kiwei ki Raij, ki Shnong bad ki shakri niam ka Raij Mynso.

Iaka jingialang la pyniaid da u Habhijan War, President Seinraij Mynso bad la ioh ka nguhblei nguhsyiem na u Ma Miki Situng, ka jingkren kyrpang shaphang ka nongrim jong ka Lehniam Chad Tyllu la pynsngew da u Ma W Shylla, Adviser Seinraij Mynsoo.

U OH Toi, President Seinraij Jowai haka jingkren kum u kongsan ula iaroh iaki khun ka niamtre hapoh ka Shnong Mynso kiba la pynlong ia kane ka rukom dustur naki snem sha ki snem kaba pyni ruh ka dak ka sakhi ba ki khun ka niamtre hapoh ka Shnong Mynsoo ki ki dang bat dangksoh iaka jingling kyrpang ka jaitbynriew.

U Raymon Nartiang Pator ka Raij Jowai haka jingkren ula ai mynsiem iaki khun ka niamtre hapoh ka Shnong Mynsoo ban long kiba iatylli bad iatreilang da ka jingiasngewthuh jingmut bad ban long ka nuska ia kiwei khnang ban neh ban sah ka niam ka rukom ka dustur ka riti pateng la pateng.