Shongkun ka lehniam Kñia Pyrthat ka Raij Jowai

Syllad | The Rising MeghalayaJuly 4, 2019

JOWAI: Ka Raij Jowai hapoh ka jinglamkhmat u Dolloi kum u khlieh ka niam khlieh ka Elaka ha kane ka 4 tarik July 2019 kila ban pyndep ia ka lehñiam Kñia Pyrthat hapdeng ka jingshongkun shongblei bad iaidbeit iaid ryntih ki kam ñiam ba la pyndep da u Sangot Paswet ha ryngkat ka jingsynranlang u Sangot Pakynteiñ bad u Sangot Pasubon kiba long ki khun ki ksiew jong ka Kur Sookpoh Khatar Wyrnai.

Ha une u snem ka Raij Jowai ka la hap ban pyndep ia kane ka lehniam ha ki ar ratap na ka daw ba ha u snem ba ladep 2018 ka Raij kam shym la lah ban pyndep ia kane ka lehniam bad mynta u snem pat ki la lah ban pyndep ia kane ka lehniam hapdeng ka jingshongkun shongblei bad iphuh iphieng da ka jingiashimbyntalang ki riew rangbah bad ki samla.

Kane kadei kawei na ki lehniam ha kaba u Langdoh Chyrmang, Langdoh Tuber bad Langdoh Ialong ruh ki iadonbyntalang bad ka dei ruh ka jinglehniam ne knia ainguh aidem ba shisien shisnem ia u Syiem Pyrthat bad ia u Mon Ryngklaw bad ruh kaba la hap ban leh ne pyndep shitaiew shwa ban poi ki sngi ki ia jong ka shad Ñiam Behdeinkhlam hapoh ka Raij ka Shnong.

Ka bynta ba khatduh jong kane ka lehniam hadien ba la dep iabam kñia ka long ka Jutang hapdeng u Doloi Elaka Jwai kum u khlieh ka ñiam khlieh ka Elaka bad u Langdoh Chyrmang uba ieng na ka bynta ki Lai Langdoh.

Na ka liang u Dolloi Puramon Kynjing ha ka jingiadei bad ka jingiaidbeit iaidryntih ki kam niam ha kane ka sngi, u ai ka jingsngewnguh ia baroh ki Langdoh kiba lashimkhia ban iadonbyntalang bad ruh ia baroh ki riew rangbah ki samla, ki longkñi longkpa kiba la ai ia ka por ba kordor ha ka ban pynlong ia kane ka sngi kaba shongkun shongblei.