Shongkun ka Lympung kaba 15 ki Khynnah Seng Khasi Sein Raij ha Lawbah

Syllad | The Rising MeghalayaJanuary 20, 2020

SHILLONG: Ka lympung kaba 15 ki khynnah ka Seng Khasi Sein Raij ka la long kaba shongkun bad kaba iphuh iphieng da ka jingwan iashim bynta shit rhem jong ki khynnah na kylleng sawdong ka bri Hynñiewtrep Hynñiew Skum.

Kane ka lympung kala long ka 11 tarik bad ka 12 tarik une u bnai Kyllalyngkot 2020, ha shnong Lawbah, East Khasi Hills District.

Ha kane ka lympung ba ar sngi la wan iashimbynta palat ia ka 2500 ngut, kiba la ioh ia ka lad ban ia shem ia kynduh bad ban ia mir jingmut ha kiba bun tylli ki phang kiba iadei bad la ka jong ka niam tynrai.

Ka phang pdeng jong kane ka lympung ka long ‘Hala Thymmei Ban Tei Ia ka Lawei’  kaba long kum shi bynta ban ialap bad wer ia ki khynnah naduh ba ki dang rit ba kin nang ban tip thuh bad ban bud ryntih ia ki jinghikai u mynbarim ha ka juh ka por ban lah ha kaban sngewthuh bad shemphang ha la ka jong ka jinghikai niam tynrai.

La ioh ruh ïaka jingpyrbyrnia ba shong sbai da ka jingia kiew rynsan ki khynnah ban pyni ia la ki jong ki sap ba nylla naduh ka rwai ka siaw, ka put ka tem ka shad ka kmen, kiba ia kine baroh la pynsawa jam beit tang ia kawei ka sur bad katta ka long ka jingkyrsiew thiah naka bynta ban pynneh bad ban pynim ia la ka jong ka niam tynrai.

U nongkren ba kongsan ha kane ka sngi dei u Dr Mihshwa Tyngkan, Asst. Director ka tnat Veterinary jong ka sorkar jylla, nalor katta ka la don ruh ka jingpynkup burom ia u treasurer jong ka synjuk katta ia u Rgh Gideon Kharmawphlang hadien ba u la kiew shaduh ka kyrdan IAS, ka jingpynkup burom ka wan ha ka dur jong ka jingpynspong paidbah ia u ha kane ka jingialang bad ka jingsam ia ki khusnam sha ki nongjop ha ka iakob ialehkai mawpoiñ bad iakob siat khnam.

Nalor kata la ioh ruh ia ki symboh jingken na ki hep barit jong ki tnat Seng Khasi Sein Raij bad ki nongkren ha kane ka lympung ka kynthup na ka Sankani Kyndiah, ba dei napoh ka tnat jong ka Seng Khynnah Shlem Hikai Tynre Dulong, West Jaintia Pyllun, Bateiskhem Rynjah, na ka Seng Khynnah Nongkynrih, Ri-Lum Pdeng, la ioh ruh ia ka jingkren lyngkot na u Rgh Puramon Kynjing, President ka Lympung ki Seng Khynnah Seng Khasi Sein Raij.

La pynshngain shuh shuh ia kan ka lympung da ka jingia synran lang u President bad General Secretary ka Seng Khasi Kmie, Rgh D.K Dkhar, Rgh P.D Nongrum bad don lang ryngkat u MLA bad MDC Mawsynram Constituency.

Ia kane ka lympung la pynkut da ka jingaiti ia ka dongmusa na ka kti jong ka Seng Khynnah Lawbah sha  ka Seng Khynnah Mawkhap, Laskein, Pyllun, kaban shim pat ia ka bynta ban pynkhreh ban pynlong ia ka lympung kaba 16 ha u snem u ban wan.

Hadien kane, u Rgh D.K Dkhar President Seng Khasi Kmie u la shim ia ka bynta ban pynhap ia ka lama jong ka seng kum ka dak ka jingpynwai noh ia kane ka lympung kaba 15.