Shongkun ka Proseshon Iukharist ka Parish Ummulong

Syllad | The Rising MeghalayaFebruary 17, 2020

JOWAI: Kumba ju long shisien shisnem ka Proseshon Iukharist ka Parish Ummulong, mynta u snem ka la long ha kane ka 16 tarik mynta u bnai, ha kaba da ki hajar ngut ki paidriewngeit na ki Parish ba marjan ka Jowai Diocese, Archdiocese Shillong bad na ka Diocese Nongstoin ki la ia wan shim bynta shongshit sha kane ka Proseshon Iukharist jong ka Parish Ummulong.Ha shwa ban pynlong ia ka jingknia Mass Iukharist bakhuid la ioh ia ka jingkren pdiang sngewbha ia baroh ki nongiawan shim bynta sha kane ka proseshon da u Phadar Policarpus Shylla, Parish Priest jong  ka Parish Ummulong.

Ha ka por 10 baje mynstep la pynlong ia ka jingknia Mass Iukharist bakhuid kaba lamkhmat da u Phadar Hilarius Lamare Parish Priest ka Parish Jowai uba long ruh u Vicar General ka Jowai Diocese ha ryngkat ka jingiasynran lang ki Lyngdohsohblei (Phadar) kiba la wan shim bynta sha kane ka Proseshon.Ka jinglehniam ka long kaba shongkun shongblei ha kaba ia ki Lyngdohsohblei ban kiew sha ka Duwan jingknia la lamkhmat  da ka jingshad tynrai da ki khun samla lud jong ka Balang shnong Ummulong bad da ki jingruwai ba sngewbang sngewthiang da ka Quire kaba iahapsur bad ka jingshad.

U Phadar Hilarius Lamare, u kongsan ha kane ka sngi ha ka sneng ka kraw  ia ki paidriewngeit u la shim halor ka phangpdeng “To ngin long ki briew kiba bat hukum” U Phadar Hilarius u ong u Blei u la ai ha ngi ia ka mon kaba laitluid ka shong ha ngi ban jied ia ka babha ne ia kaba sniew. Haba pharia halor kane ka phang, u Phadar Hilarius u ong lada ngi jied ia kaba bha, kata ngi long ki briew kiba bat hukum ngi kamai ia ka hok ka sot bad ngi tei ia ka jinglong babha ialade, ia ka iing ka sem, ia ka imlang ka sahlang ha iing hasem, ha ka kur, ha ka Jait,ha shnong ha thaw, ia ka Balang bad ia ka jait bynriew hi baroh kawei. Lada ngi jied pat ia kaba sniew ka pynsniew ialade, ia ka iing ka sem, ia ka imlang ka sahlang, ia ka kur ka jait, ia ka shnong ia ka thaw, ia ka Balang bad sma iwtung bad pyut ka jaitbynriew hi baroh kawei. U Phadar Hilarius u pynkut ia ka jingkren jong u da kaba kyntu ia baroh ban long ki briew kiba bat hukum bad ka jingbat ia ka hukum ka jong u Blei ka wanrah ia ka bha ka miat ha baroh ki liang jong ka longbriew manbriew.

Ha ka nohphai sngi la pynlong ia ka jingiaid proseshon Iukharist hapoh ka shnong Ummulong ha kaba ki paidriewngeit ki la iashim bynta ha kane ka jingiaid proseshon. Ha shwa ban pynwai da ka jingkyrkhu da ka Sakrament bakhuid tam ka Duwan na kti u Phadar Hilarius Lamare, la ioh ia ka jingkren kaba sngewtynnat shaphang ka jingkhraw jong ka Iukharist bakhuid bad kaba long ka pdeng jong ka jingngeit Khristan Katholik da u Phadar Cresence Roy Laloo, Parish Priest ka Parish Namdong. Nangta u ong shuh shuh ka jingkhraw bad ka pdengduh jong kane ka Sakrament Iukharist, ka long ba kane ka Sakrament ka don bynta ha baroh ki  Hynniew tylli ki Sakrament hapoh ka Balang.

Ha ka juh ka por u kyntu ia ki para bangeit ban pdiang ia kane ka Sakrament dei ban long ki briew kiba la pynkhreh lypa bad wan Mass bakhuid ha ka por kaba biang kata naduh basdang jong ka jingknia Mass bakhuid ym kaba shu wan dier por bad pdiang syndon ia kane ka Sakrament laitnoh kiba don hapdeng ka jingpang jingshitom. La katta ruh u ong to ngin pyrshang katba lah ban ia beh por bad ban ia ioh bynta ha ka jingknia Mass bakhuid naduh kaba sdang jong ka jingknia Mass bakhuid bad ia shim bynta ha ka iabam iasip ia ka Iukharist bakhuid kaba long ka Met bad ka Snam kaba shisha bad kaba im jong u Jisu Khrist bad dei lyngba ka Iukharist kaba u Jisu u la pynurlong ba Un iaisah bad ki briew haduh kaba wainoh ka pyrthei. Contributor | MM Thaiang