Shongkun ka Republic Day ha Jowai

Syllad | The Rising MeghalayaJanuary 26, 2019

JOWAI: Ka Nongbah Jowai kala ïasnohkti lang bad ka Ri baroh kawei ban rakhe ïaka ‘70th Republic Day’ ne ka jingïoh synshar lade ka ri India. Kane ka jingrakhe ïaka sngi khraw ka ri ka long kaba shongkun bad kaba iphuh iphieng bad la wan iashimbynta da hajar ki paidbah ha Jowai.

La pynher ïa ka lama ka ri da u Ma Lahkmen Rymbui, Myntri ka tnad Pule Puthi jong ka Sorkar Jylla ha Madan Jrisalein, Jowai. Haka Parade ki don 24 tylli kynhun kiba ïa shimbynta naduh Pulit, Home Guard, NCC bad ki skul jong ka district.

U Myntri ha ka jingkren jong u, ula ong ba kum kane ka sngi ngi kynmaw burom ïaki longshwa jong ngi kiba da ka jingiohi jngai bad ka jingïalam ba radbah jong ki, kila saindur ïa ka Riti Synshar bad pynlong ïa kane ka ri, ka ri synshar paidbah kaba khraw tam ha ka pyrthei. To ngin pynpaw ka jingsngewnguh sngewburom ia ki nongialeh laitluid jong ngi kiba la len lade ban pynïoh ka jinglaitluid ïa ngi bad ngin kynmaw ieit ruh ia ki khlawait jong ka jylla jong ngi, u Tirot Sing, U Kiang Nangbah bad Pa Togan Sangma bad kiwei ki riewshlur.

Ula ong ruh ba ka jingshongsuk shongshngain haka jylla kala wan phai biang hadien ka jingkyllem ki riew kieng atiar haka jingïaleh pyrshah bad ki Pulit ka jylla kumjuh ka jingwan pyndem ki ehrang. 

Ka sorkar ha kane ka snem mang tyngka 2017-18 bad 2018-19 kaba la mang ban shna 36 tylli ki projek  shna surok yn pyntreikam lyngba ka Rural Infrastructure Development Fund na ka bynta ban pynbha ia ki surok hapoh ka jylla kaba la kot haduh 72.19 Klur. Hapoh aka State Plan 32 tylli ki projek surok kaba shongdor T.48.39 klur.

Lyngba ka RPMGSY kumba 186 tylli ki shnong la dep pynïasoh ïa ki surok haduh u bnai Risaw. Ka World Bank ka la bei pisa ia ka PMGSY rural road project II 810.42 klur ban shna kumba 290 tylli ki surok bad 36 tylli ki jingkieng.

Ka Development Budget lane ka mang tyngka na ka bynta ki kam pynroi naka bynta ka snem 2018-19 ka long 7118.00 klur kaba kynthup 116.23 klur ka jingiarap na ka Non Lapsable Central Pool of Resources (NLCPR) , 118.73 klur na ka North Eastern Council bad 90 klur hapoh ka Article 275 (1).

Mynta kumba 70,000 ki longing ki donkti ha ka kam thain jain ne rep sai rusom bad da ka jingkyrshan jong ka Central Silk Board hapoh ka North Eastern Region Textile Promotion Scheme kata ka Integrated Sericulture Development Project (ISDP) la nang kyntiew ia ka kam pynmih sai rusom ha Thadlaskein bad Laskein Block Jaiñtia Hills, Muga ha West Garo Hills ha Tikrililla bad Eri ha East Garo Hills. 

Ka jylla Meghalaya ka long kaba riewspah ha ka jingdon ki marpoh khyndew kum u dewiong, mawshun, mawlein, granite, silimanite, uranium, iron ore bad ka dewbyrtha. Ka jingïoh ha ka dur ka royalty bad mineral cess kaba la lum ha ka snem 2016-17 ka long 469, 51, 60,064/- (sawspah hynriewphew khyndai klur, sanphew wei lak,hynriewphew hajar hynriewphew saw) bad ha ka snem 2017-18 ka long 207,87,97,098 (arspah hynniew klur, phraphew hynniew lak khyndaiphew hynniew hajar khyndaiphew phra). Ka sorkar ka la shim khia ban pynïaid beit iaid ryntih ïa ka kam tih marpoh khyndew ha ka jylla da kaba ka wanrah ïa ka rukom tih kaba katkum ka jingstad saian katkum ki ain tih par jong ka sorkar pdeng, da kaba pyrkhat kyrpang ia ki bynta kiba iadei bad ka jinglong trai ia ki jaka bad ka dustur jong ki briew.

Kum ka dak ban kunmaw burom ïa ki nongialehlaitluid  ka sorkar kan sa sdang shen ïa  Ka Kiang Nangbah Indigenous Knowledge and Culture Centre ha Syntu Ksiar bad ka Pa Togan Sangma Indigenous Knowledge and Culture Centre ha Williamnagar.

Ha kaba ïadei bad ka jingpynbiang ïa ka umdih sha ki jaka sor ka sorkar kala ïaid shakhmat bad kumjuh abn pynbha ïaka pule ka puthi nalor kiwei kiwei ki kam pynroi ban kyntiew ïaka ïoh ka kot ki nongshong shnong.

Ha Jowai la sam ïaki khunsam sha ki nongïashimbynta; haka Parade ka skul H.K.Singh Higher Secondary ka la wan nyngkong bad ba ar ka North Liberty Higher Secondary School bad ba lai  ka St. Mary Mazzarello Higher Secondary School.

Ha ka jingpyni dur (tableau) ba wan nyngkong ka dei ka ophis District Agriculture Officer, ba ar ka ophis Sericulture bad ba lai ka ophis District A.H & Veterninary.

Ka Nartiang PHC kala ïoh khusnam pisa T.2 lak bad T.50 hajar ka Shangpung PHC halor ka jinglah jong ki ba pynneh ïaka khuid ka suba bad ka jingai jingshakri kaba pura ïa u paidbah kaba hap haka Kayakalp kaba sdang da ka Ministry of Health and family Welfare Government of India ban pynshlur ïaki jaka suamr sorkar ban pynneh ïaka khuid ka suba bad ka jingai shakri kaba pura ïaki nongpang.

La pynkup burom ruh ïaki riew shimet kiba la pynjop ïaka jingai injek Measles Rubella Campaigns kaba la sdang naduh Nailur 24, 2018 ha West Jaintia Hills. District. Baroh District kawei ka district ka jingai injek kala 96 percent.

La pynbyrngia ïaki paidbah ba wan sakhi ïaka sngi khraw ka ri da ki  prokram jingrwai, jingshad bad kiwei kiwei na ki skul bad ki shnong ba pher  ba pher bad ka jingsam bam, ki jingai sngewbha sha ki nongpang ha ka hospital  Dr .Tunnel, Civil Hospital bad ïaki koidi ha District Jail.

Picture Courtesy: ADIPR