Shongshit ka Chad Sukra ka Seiñraij Jowai

Syllad | The Rising MeghalayaApril 13, 2021

Ka tamasa Chad Sukra jong ka Seiñraij Jowai kaba long haka sngi ba Ar kala long kaba shongshit bad kaba iphuh kaba phieng da ka jingwan ïashimbynta ki rang bad ki samla na ki dong bad ki shnong bapher bapher ka sor Jowai.

Ka Chad Sukra kadei kawei na ki jingshad tamasa kaba ju leh da ki longshuwa-manshuwa hashuwa ban leit bet ia u symbai u phniang sha ki hali ki pynthor jong ki.

Kane ka tamasa kala sdang naduh 12 tarik da ki jinglehkai drama ha ki ïungwalieh bad ka mat pdeng jong ka mynta ka kynti kadei “A syiem Myntdu to kit to da kam ka hukum nadooh nachwa”.

Mynshem snem ïa kane ka tamasa, ki khun ka Seiñraij Jowai kila pynlong ïa kane ka tamasa hala ki jong jong ki ïing ki sem jong ki bad mynta ka kynti namar ba la kham pynjynsur ka sorkar ïaki kyndon ban ïada ïaka khlam COVID-19 ki paidbah kila tuid ban sakhi ïa kane ka tamasa.

Ki khun samla kynthei bad shynrang kumjuh ki longkmie kila shimbynta ha kaban shad hala ki jong ki sur jingrwai tynrai kiba iadei bad ka mei ramew bad ka dustur ka riti kaba la pynhun jrut ïaki nongwan sakhi.

La sdang ïaka Chad Sukra ha Mynkoi Pyrdi da ka jingïalang ba la pynïaid da u Ma OR Challam President Seiñraij Jowai, ka nguh Blei na u Pator u Raymond Nartiang bad ki kyntien lyngkot na u Chairman Art & Culture u Ma KF Laloo.

Ban pynbyrngia ïaki spah ngut ki paidbah kiba wan sakhi ïaka Chad Sukra ki samla kynthei bad shynrang kumjuh ki longkmie ki la ïashim bynta haki 11 tylli ki jingshad ba har rukom ba kynthup naduh ka shad ‘pyllah’, ka shad ‘Tana’, ka shad ‘Kyrwoh’, ka shad ‘kyllaiñ Kti’ bad ka shad ‘Pynjaw ne pyndom’.

Hadien pat kala don ka jingshad ‘Mih Ïaw’ kaba ki khun ka Seinraij kila mih paidbah na Mynkoi Pyrdi lyngba ka Biar ka Blai ha kaba baroh ki khun ka Seiñraij Jowai ki la ïashad kymbrum ryngkat ki sur ki rwai kiba pynsawa ïaka shnong ka thaw haduh ban da poi madan Chad Sukra, ha Ïawmusiang, Jowai.

Ha Ïawmusiang u kongsan ba wan sakhi ïa kane ka tamasa u dei u Myntri ka koit ka khiah, u Bah AL Hek. Kiwei kiwei kiba ïadonlang ki kynthup ïa u Additional Deputy Commissioner ka West Jaintia u Bah Lyngkor Kynjing uba long kum u symbud kongsan haka jingïadonlang u Dolloi ka Elaka Jowai u Bah Puramon Kynjing, u Waheh Shnong ka Tympang Dorbar Shnong u Bah Eddystone Shylla.

U Bah AL Hek haba kren ula ong “Ngam kwah ba ka wah Myntdu kan long kum ka wah Umkhrah kaba dei ka wah kaba la kylla long kum ka nala kaba baroh ki jaboh jabaiñ jong ka sor Shillong ki la tuid lut sha ka”.

Ula kyntu ïaki nongshong shnong ban ïeng ban ïakhun ban ïada ïaka wah Myntdu khnang ban neh ka jingkhuid jingsuba ka wah.

Ha kum kane ka por ba la kiew ka jingpang khlam ula kyntu ïaki paidbah ban long kiba adkar ban ïada ïalade ban lait na ka jingpang khlam.

Ula ong ruh ban pynthikna ïa kata ka Social Distancing ka long kaba shitom bad um shym la kynnoh ïaki paidbah bad ula kubur ba ki politician ruh ki pynkheiñ ïaki kyndon ïada COVID ha ki jingialap elekshon ha kylleng ki jaka bad ka jylla ruh ka sakhi ïa kane haka elekshon.

Ha kaba ïadei pat bad ka jingdawa shuti haka sngi Chad Sukra, u bah Hek ula ong ba un pynsngew ïa kane sha ka sorkar.