Shongshit ka iakop iakhun kti ba pynlong ka tnad Pulit ha Jowai

Syllad | The Rising MeghalayaFebruary 9, 2019

JOWAI: Ka rynsan ïakhun kti ba shi sngi- ‘1st Jowai Open Challenge Arm Wrestling, 2019’ kaba la pynlong da ka tnad Pulit West Jaiñtia Hills District Executive Force kala kut hadpeng ka jingshongshit haka sngi Saitjaiñ

Ka mat pdeng kane ka jingïakhun kti ka dei ka “Free, Fair & Peaceful Conduct of Election”. La wan ban ïashimbynta da ki samla na kylleng kynthup ïaki kynthei bad shynrang bad ki nongïalehkai ba paw khmat ka jylla.

Ïa kane ka rynsan iakhun kti la pynlong ha jaka paidbah ha Iawmusiang, Jowai.

Ka nam lahduh na ki shynrang-Over the Top la ioh rah da u Donnnam Kharkongor bad ba ar u Emanuel Marbniang ha kaba kila ïoh rah ka song kaba pisa T.10 hajar bad T.8 hajar. Na ki kynthei ka nam Over the Top la ioh rah da ka Badalyne Kharbangar bad ka Ribasuk Lyngdoh Mawphlang ryngkat ka song pisa T.10 hajar bad T.5 hajar.

Haka open challenge la ïohrah da u Baniaikyrsoi Khongwir bad ula rah ka song pisa T.5000/, ba ar u Jeremy Rngad bad u rah ïaka song pisa T.2000/-. La sam ruh ïaki khunsam ha ki kyrdan  bapher bapher katkum ki jingkhia.

Nalor ki paidbah la wan sakhi ïa kane ka rynsan ïakhun kti ba nyngkong eh da u BJ Cherri, MPS Additional SP Headquarter, Additional SP Crime Bah P Syiem MPS bad kwei kiwei.