Shongshit ka tamasa Lukha Festival, lashai yn pynkut da ka iakop bhabriew

Syllad | The Rising MeghalayaJanuary 31, 2020

KHLIEHRIAT: Ka tamasa Lukha Festival, kaba dei ka tamasa kaba heh tam ha East Jaiñtia Hills kaba la ai kyrteng haka wah ba pawnam ka Wah Lukha ban kyrsiew ïaki paidbah ban pynneh pynsah ïaka mariang kala long kaba shongshit bha haka sngi Thohdieng, ka sngi kaba la sdang ïa kane ka tamasa.

U Myntri ka tnad Social Welfare, Revenue bad kiwei kiwei u Ma Kyrmen Shylla ula wan plie ïa kane ka tamasa. La iadonlang Emlangky Lamare MDC ka thain kum u symbud kongsan, u Edmund Lamare Waheh Shnong Sonapyrdi, u Hambertus Nongtdu Waheh Shnong Byndihati bad kiwei kiwei kiba shah khot sngewbha.

Ïa kane ka tamsa la pynlong da ka Sonapyrdi Tourism & Economic Development Society (STEDS) bad kane ka tamasa kan dei ka sien kaba ar kaba la pynlong da ak STEDS

U Ma Daiapherbha Lamare President STEDS ula iathuh ba ka jingpynlong ia kane ka tamasa ka long ban pynkiew iaka kam shangkai pyrthei (Tourism) ha shnong Sonapyrdi bad khamtam ban iada bad pynneh pynsah iaka wah Lukha kumjuh ka Narpuh Wildlife Sanctuary.

Ula ong ha kine ki ar snem ka jingiaid lynti ka STEDS kala iatyngkhuh ia shibun ki jingeh khamtam ha kaba iadei bad ka wah Lukha kaba dei ka wah kaba la iap. Ula iathuh ruh iaka jingiaid lynti jong ka 6-Shnong Wah Lukha Association ban iada bad pynim biang iaka wah Lukha kala sdang ban urlong ha kaba District Mineral Foundation Trust haka jingshong jingialang kaba long haka 23 tarik Nohprah 2019 kala mang pisa T.2.5 klur ban sdang ïaka project pynkhie im biang iaka wah Lukha.

U Ma Kyrmen Shylla ula ïaroh ïaka STEDS kaba la shimkhia ban kyrsiew kyntiew ban tyngkai ïaka mariang bad ban phai khmat sha ka kam jngohkai kaba dei kawei na ki lad ban kamai jakpoh ki khun samla kiba bym don kam don jam.

Ula ong ba ka kaiphod jong ka Travelled and Tourism Competitiveness ka India ka don haka kyrdan kaba 34 bad kala jan iaryngkat kyrdan bad kiwei kiwei ki ri paw bha haka kam shangkai pyrthei.

Une u Myntri ula ai ka jingiaroh iaka tnad kam khlaw kaba la ai jingiada iaki mrad khlaw bad ki dieng ki siej kiba don hapoh ka khlaw Narpuh bad ula pynbna ruh ba ha u bnai Rymphang ne Lber u Chief Minister ka sorkar Jylla u Conrad K Sangma un wan dalade ban jngoh ïa ki jaka jngohkai ka East Jaiñtia Hills.

U Ma Daiapherbha Lamare ula ai ka dorkhat sha u Myntri Rangbah ka Jylla bad u ma Kyrmen Shylla ban pynlong ia ka Wah Lukha kum kawei naka jaka jngohkai pyrthei kaba paw nam.

Haka sngi nyngkong la pynbyrngia iaki paidbah nongwan peitkai da ki jingiakop bapher ba kynthup iaka jingiakop kieng lieng, iakop jngi, lehkai football (futsal).

Lashai ka sngi ki don shibun jait ki jingialehkai ha kane tamasa bad yn pynkut da ka jingiakop Miss Lukha 2020.