Shu san kynsan iehnoh kam u Chiranjib Choudhury kum u General Secretary ka MSOA

Syllad | The Rising MeghalayaJanuary 15, 2022

U Chiranjib Choudhury ba juh tip ruh daka kyrteng sin kum u Chiru, hynnin ka miet, u la phah kynsan da ka shithi iehnoh kam sha u working president ka Meghalaya State Olympic Association u bah John F. Kharshiing.

Kane ka rai ieh noh kam ka jong u Chiranjib, ba dei artad u Secretary ka Meghalaya Table Tennis Association, ka jia long ba ha kine ki khyndiat bnai kiba la dep, ka lamih ka jingdawa na ki kawei na ki sengbhalang ha ka jylla, kaba ha ka shithi ba ki la phah sha u myntri ba dei khmih ia ka tnat sports jong ka jylla u bah Banteidor Lyngdoh bad kumjuh ia ka kopi sha u working president ka MSOA, bah John F. Kharshiing,  ba na kiba bun ki mat ba ki la dawa, kawei na kine ka long ba dei ruh ban nym shah ne khanglad ia ki briew bym dei ki trai ri ki trai muluk ban bat kat ia ka shuki jong general secretary jong ka MSOA, kaba dei ka synjuk kaba khmih ia baroh ki synjuk ialehkai ba ong ne tip kum ki Olympic discipline.

Haba iakren bad u nongthohkhubor, na ka liang u bah John F Kharshiing u iathuh ba ia kane ka shithi ieh nohkam ka jong u Chiranjib u la ioh ban pdiang ia ka hynnin ka janmiet, ha kaba u la thoh shai ba u la rai ban ieh noh ia kane ka kam mardor bad ki daw kiba u la pynpaw ha kane ka shithi hi ka long na ki daw ba shimet bad ka jingbunkam  bad ha ka iing ka sem ka jong u.

Hadien ba la ioh ban pdiang ia kane ka shithi iehnohkam, u bah John u la iathuh ba mar mar u la pyntip shwa ia kane ka khubor sha u ex officio president ba dei artad u Myntri ba dei khmih ia ka tnat Sports u bah Banteidor Lyngdoh, bad hynne hi ka sngi, ka 15 tarik Kyllalyngkot 2022, u la lum ia ka jingialang jong ka executive council meeting jong ka MSOA, khnang ban ia thir ia tai sani bha halor kane ka rai iehnoh kam ka jong u Chiranjib Choundhury.

Haba jubab ia ka jingkylli, la kane ka rai ieh nohkam ka jong u Chiru ka dei ne em ba ka la don katta ka jingdawa na kawei na ki sengbhalang kaba da ujor syndon ha ka dur ka dorkhat shaduh u Myntri ba dei khmih ia ka tnat sports, u bah John, ha kawei ka liang u kubur, ba ka MSOA, kala ioh ba kan pdiang ia ka kopi jong kane ka dokhat, kaba la ai lyngba da ka seng Hynniewtrep Integrated Territorial Organisation (HITO), ha u bnai Naiwieng jong ka snem kaba la dep, tangba na ka liang u bah John, u iathuh ba ha ka por ba ki nongialam ka HITO ki leit ban aiti ia kane ka kopi jong ka dorkhat sha ka MSOA, la ia don lang ruh ki dkhot nongkitkam ki jong ka, bad hadien kane, ki la don ki jingialang, ia kaba ia kane ka mat jingdawa ba donkam ban weng ne ban nym shah ia ki bar jylla ban long ki nongkitkam ba hakhmat, khlem pat shim satia ia kino kino ki rai.

Kumta hapdeng ka jingiakren wan noh ki shuti bad kyndit dei tad hynnin ka miet, ba la wan poi pat kane ka shithi na u Chiranjib ba un ieh noh ia kane ka kam, ha kaba ha kane ka shithi, u Chiranjib u khlem shim la pynpaw pat ia kano kano, tangba ka daw kaba u la ai baroh dei beit ki daw ba shimet ki jong u.

Hynrei na ka liang u bah John u kwah ba un pynshai ba ka jinglah ban pynlong ia ka State Olympic Association, kaba dei ka kmie ne katta ka shatri jong baroh ki synjuk ialehkai ha kane ka jylla, haba ki nongmihkhmat baroh ki wan na la ki jong ki jong ki synjuk ialehkai ne phah ia ki nongmihkhmat sha kane MSOA.

Da kumta haba dei ban ia tynrong ia ki kam, ha ka liang ka sports, la ialeh ban jied ia ki briew kiba tbit tam, da kaba u la ong pat ba lehse ka jingdawa jong ki seng bhalang, kan long pat ka jingkyrsiew thiah ia kiba bun ki synjuk ialehkai kiba don ha kane ka jylla, ha kaba u bah John, u ieng pat ban kyntu ne ialap iawer ba ki paidbah trai ri trai muluk ka jylla, ba ka por ka la dei ia ki ban ia mih hakhmat ban kit ia bah lem ia ki kam, tangba kawei pat ka jingeh kaba la mih pat ka long ba bun na ki synjuk ialehkai ba don ha ka jylla ki duna bhai a ki nongkitkam.

Kumta u bah John u wer ia ki samla ba kin ia mih shakhmat ban ia kit ia bah lem kum ki dkhot nongkitkam ki synjuk ialehkai bapher bapher khnang ban ia ai mynsiem bad ban ia snoh kti lang ha kumba ki 30 tyli ki synjuk ialehkai.