Shuwa u 2023 kan phuh phieng ka Amlarem Constituency

Syllad | The Rising MeghalayaOctober 6, 2022

Ka 7 Amlarem Constituency kaba hap ha Amalrem Sub Division, West Jaintia Hills District kan sa long ka constituency kaba phuh kaba phieng, namar ba ha kine ki khyndiat sngi ban wan yn shna pyndep lut iaki surok ba pyniasoh ia bun tylli ki shnong, yn pynpoi iaka umbam umdih bad jingtei ba har rukom bad kiwei kiwei.

U Ma Lahkmen Rymbai Myntri ka tnad pule puthi bad ka tnad kam pohiing haba kren bad ki nongthoh khubor haka sngi Palei, hadien ka jingpynkup iaki samla kiba pass bha da ka 7 Amlarem LA Constituency Academic Award, ula ong ba ha ki khyndiat sngi ban wan yn sdang ban siang iaki surok hapoh ka constituency jong u ban pynsuk iaka leit ka wan u paidbah ka thain baroh kawei.

U ma Lahkmen uba long ruh u MLA ka thain, ula iathuh ba ka surok kaba pyniasoh iaka Dawki bad Muktpur kaba jngai 10 KM la dei ban shna 5 KM lyngba ka skim PMGSY. Katba ka surok na Amlarem sha Muktapur lah dep ban khot tender haka jinglut kaba T.20 klur tyngka lyngba ka CRF bad haka juh ka por yn pynheh iaka surok na Pdengshakap haduh Amlari.

Ha kane ka kynti haduh 150 KM ka surok hapoh ka Amlarem Constituency la mang ban shna, la ong u ma Rymbui bad bynrap ba u sngewkmen ba haka rta jong u, um pat ju ïohi ïaka jinglehbha jong ka sorkar ïaka Constituency Amlarem, hynrei ha kane ka samoi ka sorkar MDA kala lehbha ïaka Amlarem Constituency la ka long haki skul, ki jaka sumar, ki surok bad kiwei.

Haba ïadei bad ka umbam umdih, ula ïathuh ba ki shnong kiba ym pat ïoh ïaka umbam umdih lyngba ka skhim JJM kin sa ïoh lyngba ka jingiarap pisa ka NABARD lyngba ka RIDF bad lyngba ka sorkar Jylla.

Halor ki kam jngohkai pyrthei ne tourism, u Ma Rymbui ula ïathuh shuh shuh ba kumba T.40 klur tyngka la mang ban kyntiew ïaka tourism hapoh ka thaiñ baroh kawei. Ula ïathuh ruh ba la dep pyllait ïaka pisa kaba 10 klur tam ban shna ïa ka Log House ne ka iing dieng ha Shnongpdeng bad ka jingtrei kan sa sdang noh shen. 

Ban nang kyntiew ïaka kam jngohkai pyrthei ha thain Darrang, ka sorkar ka la dep mang 70 lak tyngka ban shna ïaka jingkieng ha kane ka shnong.

Na bynta ban pynsuk ïaki nongwan shangkai suwari yn shna iaka surok Chyrmang, Mustem, Thlumuwi, Phe Phe bad kiwei bad bad ka jinglut na ka bynta ban siang iaka surok kalong T. 16 klur tam. Ula ïathuh ba yn shna ïa kawei ka jingkieng haka jinglut kumba 60 lak tyngka hapoh ka thain ban pynsuk ia ka kit ka bah jong ki nongrep ka thain.

Haduh mynta haduh 10 tylli ki iing skul la dep ban tei lyngba tnad Education bad 4 tylli lyngba ka Border Area Department bad mynta yn sa ïoh sanction 10 tylli ki LP skul. Shuh shuh u la bynrap ba la ïoh ban pynthymmai ïaki ïingskul Higher Secondary ha Sohkha bad Nongtalang.

Shuh shuh u Ma Lahkmen ula iathuh ba iaka Residential School kaba don ha Pdengshakap kaba dei ka residential skul kaba nyngkong eh ha Jylla yn sdang noh ha u snem ban wan, katta naduh klas 9 haduh 12. Haka klas 11 & 12 yn sdang shuwa da ka Commerce bad ka Arts stream.

U Ma Rymbui ula ong ruh ba un sa shon da ka kot lyngkdop ban ai jingkhein ia ki kam kiba la leh naduh u snem 2018-2023.

Haba ïadei bad ka jingpynkhreh ïaka election, u Ma Rymbui ula pynpaw iaka jinghun halor ka jingtreikam jong u bad ula ong ba katba u lah ka buit ka bor ula pyndep lut ban wanrah iaka roi ka par hapoh ka thain baroh kawei.