Siat ki shipai BSF ia u khar Bangla, jur ka khlong maw, tuh dieng ha khappud India Balangdesh

Syllad | The Rising MeghalayaMay 23, 2020

Ki shipai BSF kila hap ban siat shi kuli ban pynher krad ïaka kynhun ki nongkhlong maw na ri Bangladesh haka shnong Amsku hajan ka shnong Rongkum, ki shnong kaba don ha khappud India Bangladesh.

Ka khubor kaba iohlum kane ka jingjia kala jia haka 22 tarik une u bnai haka por 1:30 PM.

La iathuh ba shipai BSF kiba ap pahara ha Amsku, ka shnong kaba jngai kumbai 4 KM na ka shnong Muktapur kila hap ban siat shi kuli ban beh ïaki khar Bangladesh kiba la wan ban khlong maw tuh ha poh u pud u sam ka ri ha wah Amsku.

Ha kane ka jingsiat ki shipai ym pat lah ban pynthikna la don ba iap ba mynsaw napdeng kine ki khar Bangla kiba wan tuh maw.

Halor kane jingwan tuh dieng khlong maw ki khar Bangladesh, u Dolloi ka Elaka Satpator, u ma Daman Lakashiang ula ïakynduh ïaki heh jong ki shipai BSF ha Muktapur hynne ka sngi Saitjain haka jingiadonlang u M Singh Deputy Commander BSF, Shillong uba la wan hiar sha Muktapur.

U Dolloi ula kyntu iaki shipai BSF ban pynbiang bor pahara ha katei ka jaka khappud ban lait na kino kino ki jingeh khamtam ha kum kane ka por ba jur ka jingpur ka khlam COVID-19.