Siat lyer sat khmat ki pulit, lun maw ki sengbhalang haka ‘Public Hearing’ pynheh par mawshun ha Khliehriat

Syllad | The Rising MeghalayaNovember 21, 2020

Haduh 7 ngut ki Pulit kila mynsaw jur, kynthup iaka kawei ka pulit constable kaba la mynjur naka bynta ka khlieh bad katto katne ki dkhot jong ki sengbhalang ruh kila mynsaw naka jingialunmaw haka public hearing kaba pynlong da ka Meghalaya State Pollution Control Board (MSPCB) ha khmat ophis DC barim ka Khliehriat haka sngi Saitjain.

Ki Pulit ban pynpra ia u paidbah bad sengbhalang hadien ki siat lyer pynsat khmat ban khanglad iaka jingtur paidbah kiba pyrshah iaka public hearing ha khmat ophis DC barim ka Khliehriat.

Ka bor synshar district kala pynhiar da ki pyrton pulit ban khang lad iaka jingwan tur ki sengbhalang ha katei ka Public Hearing, hynrei shuwa ban sdang ka public hearing la mih ka jingialun maw bad jingsiat lyer pynsat khmat ki pulit kaba la wanrah iaka jingmynsaw.

Hadien kane u SP ka District, Dy SP, ki Magistor kila pyndem ha khmat ki sengbhalang bad ailad iaki ban rung sha ka jaka ba pynlong jingpynsngew paidbah, hynrei mar sien poi ha kane ka jaka ki sengbhalang ki niom bad pynjot bad pynpra iaka iing sher dara  ba pynlong jingialang.

Kane ka Public Hearing la pynlong da ka Meghalaya State Pollution Control Board (MSPCB) kadei halor ka jingthmu ka Star Cement ban pynheh ia ka par tih Mawshun ka Star Cement haka jaka kaba heh 42.051 hectare haka shnong Bishyrnot, hynrei kala pulom noh hadien ba ba ki sengbhalang, ki paid nongshong shnong kila tuk pur ban pynpra iaki iingsher dara ba thmu pynlong iaka jingpynsngew paidbah.

U DC bah E Kharmaliki hadien bala mih kane ka jingklumar ula rai ban pynsangeh shisyndon ia kane public hearing bad ki sengbhalang kiba pyrshah naduh ka ka JSU, KSU, FKJGP, HANM, HYC, EJNC, STIEH bad kiwei kiwei kila shad kmen kynhoi risa bala pyndam ia kane ka public hearing.