Slem ka Seinraij Jowai ban pynkut iaka lehniam Behdieñkhlam ba bud adong COVID-19, phah khubor ban ai tika ban iada na u Corona

Syllad | The Rising MeghalayaJuly 12, 2021

Ka lehniam Behdieñkhlam ka Seinraij Jowai mynta u snem kala poi noh sha kaba kut haka Sngi U Blei bad kala phah iaka khubor sha u khun bynriew ba tang ka jingai tika COVID-19 kaba lah ban iada ha ryngkat ka khubor halor ka jingrakhe iaka jingioh jylla ba pura kaba la kynjoh sha ka 50 snem bad ka jingioh laitluid ka ri kaba dap 75 snem.

Ki don haduh 10 tylli ki rot kiba la wanrah ha ka pung Syiem Aitnar kaba kynthup iaka Panaliar, Loomkyrwiang, Dulong, Ummulong, Umshangiar, Chilliangraij, Ïongpiah, Seiñ Kyntu Niamtre Ladthadlaboh bad Loomïongkjam.

Ka rot kaba wanrah da ka Seinraij Ummulong ka phah iaka khubor “Ka stieh ban iada Corona ka dei tang ka tika” bad ka khubor kaba phah ka Loompyrdi Iongpiah kalong “ka jingbamsap kadei ka nongshun jong ka roi ka par bad ban phai sha ka roi ka par kaba iai neh.

Ia kane ka lehniam Behdieñkhlam la wan sakhi da u Chief Justice ka Meghalaya High Court, Justice Biswanath Sommader, U DC West Jaintia Hills u Garod LSN Dykes, U SP West Jaintia Hills u Bikram D Marak nalor kiwei kiwei.

Kumba ju long man la u snem ka lehniam Behdieñkhlam mynta ka sngi ruh ka la sdang da ki lehniam bapher bapher. La sdang da Kynting khnong bud sa  ka bam Tyngkong jaka sah ka Langdoh bud pat ka Shoh Thyndai ïing da kaba bud ryntih iaki kyndon ka jingpang khlam COVID-19, kaba la wanrah ruh ka jingslem ban pyndep iaka lehniam ban Shoh Tyndai kaba la shim por ban ioh sdang iaka lehniam ha pungkyntang Syiem Aitnar haduh palat 1 kynta.

LIVE | SYLLAD | Sdang rakhe dap 50 snem ka Meghalaya da ka lehniam #Behdieñkhlam ka Seiñraij Jowai

U Dolloi ula ong ba namar ka jingduna paid kala shimpor ban pyndep iaka jingshoh tyndai ïing. Ula ong ba kim shym la shah ban iashimbynta ki bym pat ai tika COVID-19 kaba la wanrah iaka jinglehniam ha Syiem Aitnar.

Tang kiba la dep ai tika COVID-19 kiban ioh ïashimbynta haka Behdieñkhlam

Ha ka por nohphai sngi, la wan rah ia ki 10 tylli ki Rot da ki dong bapher bapher bad la pyni paidbah ia ki ha ryngkat ka jingsawa ka Bom ka Ksing, ka jingriew ka ka Bhuri ne Tangburi ha ryngkat ka risa ka kynoi kiba la shah jied ban ioh iashimbynta ha kane ka jinglehniam.

Hadien ba la pyndep ia ka lehniam ha Pung Aitnar la pyndep sa ka Dat Lawakor ka ba ia syriem bad ka jingialehkai phutbol. Ha kane ka Dat Lawakor, ki ar kynhun, ka kynhun u Langdoh bad ka kynhun u Sangot Paswet kin ia knieh ban rah ia ka Bol dieng tang da ka kjat suda shaphang wah bad sha ka phang neng, Kano kano ka kynhun kaba jop kan pyni ia ka jingseisoh ka rep ka riang ha ki ar tylli ki pynthor- ka pynthor wah bad ka pynthor Nein.

Mynta ka kynti ka kynhun u Langdoh uba ieng na ka liang ka Pynthor wah ka la jop ia ka kynhun u Sangot Paswet bad kane ka pyni ba ka rep ka riang kan kham seisoh ha Pynthorwah. La pynkut ia kane ka lehniam ha une u snem daka Bam Tyngkong ha iing ka Langdoh bud pat sa ka lehniam kaba khadduh, ka Wai-Sa-Rang. 

U Dolloi ka Elaka Jowai ma Puramon Kynjing haba kren shuh shuh bad u syllad.com, ula ong “Hadien bala pyndep iaka Behdieñkhlam ngi don ka jingkyrmen bad ngi ngeit skhem ba ki blei ki syiem kin leh i synei bad iada ia ngi naka khlam ka ngoh.”