Sma politik hak ka kam jied waheh shnong ha Khliehtyrshi, pyndam ka JHADC iaka elekshon

Syllad | The Rising MeghalayaOctober 16, 2019

JOWAI: Ka kam jied Waheh Shnong ba pura jong ka Dorbar Shnong Khliehtyrshi ka sma iw politik hak ha kaba tang namar ba don ki katto katne kiba ujor ka Jaiñtia Hills Autonomous District Council (JHADC) kala hap ban pyndam shuwa ïaka elekshon jied waheh shnong ba thymmai kaba la thmu ban pynlong ha u Risaw 21.

Kaktum ka No.JHADC/POL/30/1998/97 Dated 14 October 2019, ka Jaiñtia Hills Autonomous District Council (JHADC) kala pyndam ïaka jingjied Waheh Shnong jong ka Dorbar Shnong Khliehtyrshi namar ba don kynrum kynram.

U Dolloi ka Elaka Jowai ma Puramon Kynjing ula khot ka jingïalang paidbah jong ka shnong Khliehtyrshi haka 3 tarik une u bnai bad ula pynbna ban pynlong da ka elekshon ban jied ïa u Waheh Shnong ba thymmai ka Khliehtyrshi bad baroh ki paidbah kim shym la pyrshah ïa kane ka rai bad la buh tarik ba kan long haka 21 tarik u Risaw.

Dangshen ki 600 ngut ki nongshong shnong ka Khliehtyrshi kila phah ka jingujor sha ka konsil bad dawa na ka Jaiñtia Hills Autonomous District Council (JHADC) ban thung ïaka jingtohkit ba laitluid halor ka jingkynnoh pyndonkam bakla ïaka pisa shnong da u waheh shnong barim bad ka executive body ka shnong Khliehtyrshi bad kila dawa shuwa ban ïoh ka report halor ka jingkhein jingdiah halor ka jingpynlut pynsep ka shnong na u Waheh Shnong barim u ma Kitbok Rymbai.

Katba ki 1437 ngut kila phah ka jiingkyrpad sha u CEM ban pynneh ïaka rai u Dolloi bad kila pynpaw ba u Dolloi ula dep tohkit bad ailad ïa ki paidbah ban rai halor ka kam pynlut pynsep ka shnong. Kila pynpaw ba u paidbah ula mynjur ban aiti sha ka Executive Body kaba thymmai ban bishar bniah ïaka jingpynlut pynsep namar ba u Waheh shong barim uba la dep ai report halor ka jingpynlut pynsep bad ka jingpyntrei ïaki skim sorkar haka 23 Nailar 2019.

Hadien bym don mano mano ba pyrshah haka dorbar kaba la khot pynlong da u Dolloi ka Elaka Jowai, ula Dolloi ula pynbna ban jied ïa u waheh shnong da ka elekshon bad la dep ruh ban thep kyrteng haka 11 tarik une u bnai nalor kata la dep ai ruh ïaka shap jong ki nongïaleh ïaka kam waheh shnong ka dorbar shnong Khliehtyrshi.

Ki nongshong shnong kiba la thep kyrteng ki kynthup ïa u Kitbok Rymbai waheh shnong barim, u Stamly Dkhar bad u Saimi Dkhar kila dep ban thep kyrteng.

Kaba lyngngoh pat ba katkum katei ka shithi kaba la phah ka Administrative Officer jong ka JHADC sha u Dolloi ka Elaka Jowai kala bthah ïa u Dolloi ka Elaka Jowai ban pynsangeh shuwa ïaka elekshon tad haduh bala bthah da ka executive committee da kumwei namar ba don ka jingujor da ki katto katne ki nongshong shnong ba ym dei ban leh kyrkieh ïa kane ka kam jied waheh shnong namar ba dang don bun ki kynrum kynram.