SNEM WARIM, SNEM THYMME

Soolangki LalooDecember 31, 2022

Ibor iong o katu dalut
I rta iong o kattu dakut.
Tiap, tiap uni dawan dow wi
Snem thyme kattu ha i.

Hukum nachwa nalap da em
Wym chah ka nia wow neh chi slem.
Kai jingim bru heini ha pyrthai,
Chisien u wan, chisien u lai.

Snem rim kattu na i da jngai,
Wym iachem de heini ha pyrthai.
Iame chiboon kiwa bien, wa roh
Yei sih, I bha hame wa ioh.

Snem rim kattu sadu hei kynmoo,
Bru pyrthai kat kiwa ioo.
Yeibha wa mih hame
Chiboon ki wow makhane.

Pyrdi synniaw Khat-ar waje
Snem rim dalai, wan Snem thyme.
Dei iachad, ia kmen pdiang snem thyme
Chi-iaw, chi-iaw haduh wache.

Khynnah, waheh, chynrang, kynthai
Kyllein soodong wa ia uin, ia lai.
Dei iachad, iarwai sur har rukom
Iow Snem thyme wa pdiang burom.

Miet Snem thyme kat won ioobang
Wa iachad, ia kmen u waboon walang.
Khynnah, waheh, kynthai, chynrang
Kam chi-paiu chirrup deilang.

Snem thyme kattu ha I  da wan,
Thij hei longbru, manbru dei wi tawan.
La hei khih I khan nae purae, puthi
Jingim to sdang seindur dei wi.