Sngew skhem ka NPP ban jop ha kane ka ilekshon Lok Sabha na Shillong bad Tura seat

Syllad | The Rising MeghalayaFebruary 15, 2024

U nongialam ka NPP uba dei ruh u dkhot ka kynhun Myntri, u Marcuise N Marak haka 14 tarik Rymphang, u la pynpaw ia ka jingsngew skhem ba ka party kan ioh ia ka jingjop na baroh ki artylli ki parliament constituency, kata napoh Shillong bad Tura.

Haba kren sha ki lad pathai khubor, u Marak u la ong ba ka sitting MP na Tura ka Agatha K Sangma khlem artatien kan dang ioh ia ka jingjop kaba donburom ha kane ka Lok Sabha ilekshon ka ban sa long shen.

“Kumjuh na Shillong ruh ngi kyrmen skhem ban ioh ia ka jingjop. Ngi kyntu ia ki paidbah Khasi Jaintia ba ki dei ban ai ka jingkyrshan ia ka NPP namar ka la pyrshang ban leh ia kaba bha tam hapoh ka jingialam jong u Conrad Sangma. Phi la iohi mynta ia ki jingkylla ha ka jylla, kumta ngi kyrmen ban ioh ia ka jingkyrshan na ki paid nongshong shnong ka jylla,” u la ong.

“Lada ngin ioh arngut ki MP ha Delhi kan pynsuk shibun ban pyllait ia baroh ki skhim ba la bei da ka sorkar pdeng, kan pynsuk shibun ia ngi na ka bynta ban pyniaid shakhmat ia ki projek kam pynroi,” ong shuh shuh u Marak.

Haba kylli halor ki jingkynnoh jong ka BJP, une u nongialam ka NPP u la ong, “Phi lah ban leit sha Garo Hills bad jurip ia ka jinglong jingman bad sakhi ia kaei kaba ka Agatha ka la leh. Shibun bah ki kam ka la leh. Shibun bah ki jingtei na ka bynta ki skul ka la lah ban pynioh lyngba ka MPLADS bad wat lyngba ki skhim ka sorkar pdeng, kata nalor ka jingpynioh ia ki jingiarap pisa na ka bynta ki projek napoh Delhi.

“Halor ki jingkynnoh jong ka seng Congress, u la ong ba kum kine ki jingkynnoh kin don beit,  hynrei kylli na ngi shano ka don, ka don beit ryngkat bad ngi, ka don beit ha man la ki prokram,” u la ong shuh shuh.

Ha kawei pat ka bynta u Marak u la ong ba ka NPP kan shimkhia ha ka jingiakhun pyrshah ia baroh ki kynhun la ki dei kiba heh ne kiba rit.