Sngew skhem u Bah PN Syiem ba ki paidbah kin dang pynjop biang

Syllad | The Rising MeghalayaJanuary 29, 2025

U Nongialam ka Seng Congress uba dei ruh u Chief Executive Member (CEM) barim ka Khasi Hills Autonomous District Council (KHADC), u Bah Pynshngainlang N Syiem u la pyndep ia ka jingthep kyrteng ban iakhun ia kane ka elekshon MDC na Mawkhar-Pynkhorumkhrah kaba u la mihkhmat mynta.

Haba kren sha ki lad pathai khubor, u Bah PN Syiem u la pynpaw ia ka jingsngew skhem ba ki paidbah ka constituency kin dang ai ka jingshaniah ha u bad ban pynthikna ba un shah jied biang shapoh District Council.

“Nga sngew skhem ban jop ha kane ka elekshon namar nga la noh synniang shibun sha ka constituency bad ruh sha ka KHADC lyngba ka jingmynjur ia kiba bun ki Bill,” u la ong.

“Ngi la wanrah ia ki jingpynkylla (amendments) ba donkam ban aijingithuh ia ki Seng Kynthei bad Seng Samla ha ki Dorbar Shnong,” ong u Bah Pynshngain haba ban jur halor ka jingdonkam ban wanrah shuh shuh ia ki jingpynkylla khnang ban pynbha bad pynjanai shuh shuh ia ki ain hapoh ka KHADC khnang ban pynkhlain shuh shuh ia ki jingtreikam na ka bynta ki jingmyntoi jong u paidbah ka thain baroh kawei.

Nalor kata une u nongialam ka Congress u la ong ruh ba ka party jong u ka la leit sha u pidbah ban pan ia ka jingkyrshan halor ki shiphew tylli ki mat, kiba kynthup ia ka jingdonkam ban buddien ia ka jingtyrwa ban pynkylla ia ka Sixth Schedule ka riti synshar Ri bad ruh ban pynthikna ba kine ki jingpynkylla kin pynmyntoi ia ki trai shnong riewlum ka jylla.

U Bah Pynshngain u la ong ruh ba ka party kan ialeh ban pynbha bad pynjanai shuh shuh ia ka jingtreikam jong ka Executive, Legislative bad Judiciary ka KHADC da kaba pynbha ia ka jingpynmih pisa ban pynthikna ba ki nongtrei ka Council kin ym iakynduh jingeh  ha kaba iadei bad ka jingsiew ia ka tulop.

“Ngi kular ruh ban shim ia ki sienjam na ka bynta ban iada bad pynneh pynsah ia ka mariang kynthup ia ki tyllong um da kaba iatreilang ryngkat bad ki nongialam shnong bad ban kyntiew bad pynneh pynsah ia ka ktien Khasi lyngba ki rynsan bapher bapher,” u la bynrap.