Sngew skhem u Bah Ricky Shullai ban ioh ia ka jingjop na Laban-Mawprem 

Syllad | The Rising MeghalayaJanuary 31, 2025

U MDC barim ka Laban-Mawprem constituency u Bah Ricky Shullai u ban ia aireng kum u kyrtong shimet u la ong ba u sngew skhem ba un ioh ia ka jingjop ha kane ka elekshon sha ka KHADC ka ban long ha ka 21 tarik Rymphang.

Lah ban kdew ba u Bah Ricky uba dei u pyrsa kur jong u MLA ka BJP na South Shillong u Bah Sanbor Shullai u la shah rem noh ha ka elekshon ha u 2019 tang da 19 vote.

Haba kren sha ki lad pathai khubor ha ka jingleit thep kyrteng ha ISBT Mawiong hynne ka sngi 31 tarik Kyllalyngkot, u Bah Ricky u la ong, “Watla nga la shah rem noh hynrei nga la rai ban bteng ia ki kam na ka bynta ka bha ka miat ha ka imlang ka sahlang, bad nga la don beit ha syndah bad ki paidbah ka constituency ha kine ki hynriew snem kiba la dep namar ka jingieid ka jong ki. Nga sngew skhem ba ngan ioh iaka jingjop ha kane ka elekshon ka ban wan.”

Haba kylli, u Bah Ricky u la ong, “Watla nga dei u MDC barim, hynrei na ka bynta ki paidbah ka constiteuncy nga dei u MDC man ka sngi.”

Haba pynpaw ia kiba bun ki jingeh kiba ki paidbah ka constituency ki iakynduh, une u MDC barim u pynthikna ban kyntiew ha ka liang ka ioh kam ioh jam hapdeng ki samla lyngba ki kam karkhana rit.