Sngew skhem u CM ba ka NPP kan dang wan ha ka bor ha ki ADC; don kiba pyrshang pyniapher jaidbynriew

Syllad | The Rising MeghalayaFebruary 16, 2025

U National President ka National People’s Party (NPP), u Conrad K Sangma u la pynpaw ka jingsngew skhem ba ka NPP kan dang ioh ban bat baing ha ka bor ha KHADC bad JHADC hadien kane ka elekshon ka ban long ha ka 21 tarik Rymphang.

Ia kane u CM u la pynpaw haba aijingkren ha ka jingialang ialap elekshon ha ka 15 Rymphang ha Jirang constituency ban pan jingkyrshan ia u kyrtong ka party u Bah Sosthenes Sohtun ha kane ka elekshon sha ka KHADC.

Ha ka jingkren u Conrad u la ong, “Kane ka elekshon ka dei kaba kongsan bha, bad kiba bun ki party sain pyrthei ki la pyrshang ban pyndonkam da ka politik jong ka jingsngew iapher jaidbynriew bad pynpra pynpra ia ki briew ki jong ngi. Ka NPP ka dei kaba burom ia baroh ki jaidbynriew bad ka la trei ban wanrah ia ka roi ka par na ka bynta baroh. Ngin hap ban iatylli bad vote ia ka NPP khnang ban ai ia ka jubab kaba biang tam ia kito ki seng sain pyrthei kiba pyrshang ban pynphriang ia ka jingiashun bad jingbym shaniah.”

Haba bynrap ba ia ka jylla Meghalaya la tip bha halor ka jingdon ia ki nongshong shnong kiba ieit ia ka jingsuk, u CM u la kyntu ia ki paidbah ba ki dei ban pyrkhat na ka bynta ka lawei jong ka jylla bad ban iatylli lang bad ai ka jingkyrshan bad vote ia ka NPP.

“U MLA jong ngi (Sosthenes) u la shim ia ka bynta ban iatei kum u MLA bad u la pynthikna ia ka jingwan jong kiba bun ki kam pynroi hapoh ka constituency ha kine ki hynniew tylli ki snem kiba la dep. Ka long kaba donkam ba ngin vote ia u kum u MDC khnang ban ailad ia u ba un iatreilang ryngkat bad ka sorkar na ka bynta ban pynkhlain ia ka District Council,” u la ong.

U Conrad u la pyrto ruh ia u Bah Sosthenes kum u nongialam bad halor ka jingaiti na ka bynta ka kam ban trei na ka bynta u paidbah. “Barabor u ju pynpaw ia ki kam ba iadei bad ka jingiakajia pud bad halor ka jinglong ha ka suk ka sain kiba mih ha ki thain khappud bad u ju kyntu ia ka jingtuklar jong ka sorkar,” u la bynrap.

Haba pynpaw ba ki jingdeh ki don beit ha man ki bynta bapher bapher, u Conrad u la ong ba ki District Council ki don ia ka bynta kaba kongsan na ka bynta ban pynlong ia ki jingiakren, iasyllok bad ban iada ia ka bha ka miat jong ki trai ri trai muluk.

U la ong ruh, “Ka lyer jong ka NPP ka khlan bha ha baroh santylli ki constituency ha Ri Bhoi. Ki paidbah jong ka District ki la pynpaw ka jingshaniah ha ki nongialam jong ka party bad ngi sngew sngew ba ka result jong kane ka elekshon ADC kan noh sha ka NPP.”

Kumjuh haba pynpaw ia ka jingsngew skhem ban dang ioh bat biang ia ka bor ha KHADC bad JHADC, une u khliehduh ka NPP u la ong ba ki Executive Committee ha baroh artylli ki Council kin dei kiba la ialam da ka NPP.

“Kiba bun ki MLA ba mynta na kiwei pat ki aprty sain pyrthei ki la kren pyrshah ia la ka jong ka party. Ki la klumar jingmut bad duh jingshaniah ha la ki jong ki nongialam.Ki la kren paidbah pyrshah ia la ka party. Kane ka pyni shai ba ki la pdiang ia ka jingshah rem bad ki la ong ruh ha kiba bun ki jaka ba ki paidbah ki dei ban mih bad vote ia ka NPP,” u la ong.

Shuh shuh haba pyntip ba ka 39th National Games 2027 kan long ha Meghalaya, u la ong ka dei ka khyllipmat kaba sngew sarong ia ka Jylla. “Ngim ju poi pyrkhat ba yn pynlong ia ka National Games ha kane ka Jylla. Hynrei, mynta ka Indian Olympic Association bad ka Sorkar India ki sngew skhem ha ka jingiohi jngai ka jong ngi ban kyntiew ia ka kam ialehkai sports ha ka Jylla.”