Sngew skhem u Dr Syngkon ba ka VPP kan ioh ia ka jingjop na Shillong parliamentary seat

Syllad | The Rising MeghalayaMarch 26, 2024

U kyrtong ka liang pyrshah Voice of the People Party (VPP) u Dr Ricky AJ Syngkon haka 26 tarik Lber, u la pynpaw ia ka jingsngew skhem ban ioh ia ka jingjop ha kane ka Lok Sabha ilekshon ka ban sa long ha une u bnai u ban wan.

Haba kren sha ki lad pathai khubor, u Syngkon u la ong ba ka party ka la long kaba la pynkhreh pura ban iakhun ia kane ka ilekshon. U la ong ruh ba ka party ka la pyndep ha kaba iadei bad ka jingleit ialap ilekshon sha baroh ki 36 tylli ki constituency hapoh Ri Lum Khasi bad Jaintia.

“Nga ha ryngkat ka party, ngi sngew skhem ban jop ha kane ka ilekshon namar kat shaba ngi leit ngi ioh ia ka jingkyrshan kaba pura na ki paidbah bad ngi don ka jingshaniah kaba skhem ha u paidbah jong kine ki 36 tylli ki constituency,” u la ong.

Haba kylli, u Syngkon u la kyntait ba ka party jong u ka long pyrshah ia ka ktien Hindi. “Ngim ju pyrshah ia ka jingkren Hindi. Kane ka jingkynnoh kam don ei ei hynrei tang ka buit politik jong kiwei pat ki party sain hima bad ngi pynrem ia kiba kum kine ki jingkynnoh.”

Da kaba pynpaw ba ka VPP ka ieng ruh na ka bynta kito ki bar jylla kiba dei hok ki nongshong shnong jong ka Meghalaya, une u General Secretary ka VPP u la ong ba u sngew skhem ba kum kine ki nongshong shnong ka Jylla ruh kin ai ka jingkyrshan ia kane ka party ha kane ka Lok Sabha ilekshon ka ban wan.

“Ngi sngewnguh ia u synniang ba la noh da kine ki briew ki bym dei ki Khasi na ka bynta ka Jylla bad ba ki donkam ruh ia ka jingiada bad na ka liang ka party ruh kan pynthikna halor ki lad jingiada na ka bynta ka bha ka miat jong ki, hynrei ha kajuh ka por ngi hap ruh ban iada ia ka Jylla na kito kiba beain.Kum ka party ngi sngewkhia jur ha kaba iadei bad ki hok wat jong kiwei pat ki jaidbynriew ki bym dei ki Khasi,” u la ong.

Nalor kata u Syngkon u la ong ruh ba ka jingshim rai jong ka BJP ban ai ka jingkyrshan ia ka NPP ka pyni ia k dur kaba shisha jong baroh kine ki party, hynrei ki ieh ia kine kiei kiei baroh ha ka jingstad jong u paidbah ba un shim ia ka rai ha kaba iadei bad kane ka bynta.