Sngew skhem u Dy CM ba ka NPP kan ioh ia ka jingjop ha kane ka elekshon KHADC bad JHADC

Syllad | The Rising MeghalayaFebruary 21, 2025

U President ka National People’s Party (NPP) Meghalaya bad Symbud Myntri Rangbah ka Jylla, u Bah Bah Prestone Tynsong haka 21 tarik Rymphang u la pynpaw ia ka jingsngew skhem ba ka party jong u kan ioh ia ka jingjop ha kane ka elekshon sha ka Khasi Hills Autonomous District Council (KHADC) bad Jaintia Hills Autonomous District Council (JHADC).

Hadien ba la pyndep ia ka jingthep vote ha Pynursla, u Bah Prestone u la ong, “Kum ki nongialam ka party, ngi la iaid kylleng ki jaka ha Rilum Khasi bad Jaintia bad ngi la iohi ba ka don ka jingkyrmen kaba skhem ha kawei pa kawei ka constituency lait noh ha ki katto katne kiba don ka jingiakhun kaba jwat. Kumta ngi sngew skhem ba ngin ioh ia ka jingjop ha kane ka lekshon ha baroh ki artylli ki ADC.”

U la ong ruh, “Ka NPP ka kut jingmut skhem ban shakri ia u paidbah bad ka Jylla lyngba ki laitylli ki ADC lada ki paidbah kin ai ia ka rai ka jong ki.”

Haba kylli, u Bah Prestone u la ong ba ka party ka la leit jurip sha jan baroh ki shnong ki thaw ban pynpaw ia ki kam pynroi bapher bapher bad halor ka jingdonkam ban don ia ki MDC ki ban iarap lem ia ka sorkar na ka bynta ban wanrah ia ka roi ka par ha man la ki constituency bad ban nang pynkhlain ia ki ADC na ka bynta ban aijingiada ia ki trai ri trai muluk.

U Bah Prestone uba la mihkhmat haduh san samoi kynthih na Pynursla constituency u la pynpaw ruh ia ka jingsngew skhem ba u pyrsa jong u, uba dei u kyrtong jong ka party na Langkyrdem-Laitkroh u Bah Rahboklang Tynsong ba un ioh ia ka jingjop ha kane ka elekshon.