Sngew skhem u heh AICC ba ka Congress kan jop ha ka ilekshon Lok Sabha ha Meghalaya

Syllad | The Rising MeghalayaOctober 20, 2023

U General Secretary ka All India Congress Committee (AICC) uba khmih ia ka Meghalaya, u Manish Chatrath hynne ka sngi Palei ula pynpaw ka jingsngew skhem ba ka party Congress kan ioh ia ka jingjop ha kane ka elekshon Lok Sabha 2023, ha Meghalaya, kata na baroh ki artylli ki seat, ka Shillong bad Tura Parliamentary seat.

Haba kren sha ki lad pathai khubor, u Chatrath u la ong; “Nga tharai ka ilekshon Lok Sabha ka ban long ha u snem u ban wan kan sa kylla ha kane ka kynti kaba mynta bad ngi sngew skhem ba ka Seng Congress kan ioh ia ka jingjop na baroh ki artylli ki seat.”

U la ong ruh; “Haba khmih ka kynhun ka MPCC hapoh ka jingialam jong u Bah Vincent H Pala, ngi sngew thikna  bad ngeit ba ngin shah jied ha u paidbah namar haba phi peit hadien ka jingwan jong kane ka Sorkar ha u bnai Rymphang-Lber, kiei kiei kila kylla lut. Kaei kaba kila kular kim shym la lah ban pynurlong”.

Nalor kata u la ong ba haba phai sha ka samoi kaba la dep ruh la sakhi ba ia kaei kaba la kular ym shym la pynurlong satia. Kumta mynta ki briew suki suki ki la sngewthuh ia ki rukom treikam jong kane ka sorkar.Ka jingbym ioh kam iohjam hapdeng ki samla ka la nangkiew. U la ong ruh ba ka jingpynkhreh jong ka party kala iaid shaid shaid.

Une u heh ka AICC uba khmih ia ka jylla u la ong haba phai sha ka ilekshon ha Khasi Hills bad ha Garo Hills, ngi la don ia ki nongialam bala rangbah, bad ym dei satia ba don tang uwei, hynrei bun ngut bad ha kaba kut, ka dei ka Screening Commmittee ha Delhi ka ban rai bad ka iaid pat sha ka Central Election Committee ban rai mano na kine ki nongialam kiba kham don jingkyrmen ban jop.

Ha kaba iadei bad ka jingialeh jong ka seng Congress ha une u snem 2024, u Chatrath u la ong ba bun ki seng sain pyrthei kila pyniasoh lang ha ka kynhun synrop INDIA bad ka dei ka kynhun kaba khlain bad kaba don ruh ia ki nongialam ba radbah na ki jylla bapher bpher jong ka ri.

 “Lada sdang napoh Tamil Nadu, West Bengal, Delhi, Rajasthan, Madhya Pradesh, bad Punjab, ngi don ki nongialam ba radbah kiba la long Myntri Rangbah ki Jylla. Kumjuh ha Bihar, Maharashtra kane ka kynhun synrop ka dei kaba heh bad kaba don ia ki nongialam ba la rim, katba kiwei pat ki don tang uwei u nongialam. Phi iathuh ia nga, kiei ki party ba don ha kane ka kynhun” ula ong shuh shuh.