Sngew skhem u heh ka AICC ba ka party Congress kan thaw ia ka EC ha KHADC bad JHADC

Syllad | The Rising MeghalayaJanuary 12, 2025

U nongialam ka All India Congress Committee (AICC) ba khmih ia ka Meghalaya u Dr A Chellakumar ha ka 11 tarik Kyllalyngkot u la pynpaw ia ka jingsngew skhem ba ka party kan thaw ia ka Executive Committee (EC) ha baroh ki artylli ki Autonomous District Council (ADC) ha Khasi bad Jaintia Hills.

“Da shisha ngin pynkhie im biang ia ka party Congress. Ha kane ka elekshon District Council khlem artatien ngin lah ban thaw ia ka EC,” ong u Dr Chellakumar haba kren sha ki lad pathai khubor hadien ka jingialang jong ka party.

U la kam ruh ba ka Congress ka la nangkiew sted bad ong, “Ki don bun bah ki briew kiba kwah ban pyniasoh sha ka party Congress bad ki la wan ruh ban pyniasoh bad kiba bun kiwei pat kin dang wan pyniasoh sha ka party, bad ngin pdiang iwei pa iwei bad phin sa iohi ha kine ki khyndiat sngi ki ban dang wan.”

Haba kylli halor ka rai jong ka Congress ban mih noh na ka EC ba la ialam da ka NPP ha KHADC khyndiat por shwa ka jingpynlong ia ka elekshon MDC, u Dr Chellakumar u la ong, “Dei kane kaba nga la batai sha ki kyrtong jong ka party ba ngi la iasoh bad ka NPP ha ka District Council ban pynkhlain ia ka Sixth Schedule”.

“Ka Congress kam iasam ia ka bor hapoh Delhi mynta, hynrei ka NPP ha kine ki 10 snem ba la dep ki la iasam ia ka bor hapoh Delhi, hynrei kim shym la lah ban pynrung ia ka Ktien ha ka Khyrnit ba Phra kat haduh mynta, hynrei haba ka Congress ka la iasnohkti hapoh District Council ki la lah ban pynkupbor ia ki kynthei bad ki samla. Kumta kane ka dei ka jingiapher hapdeng ka Congress bad kiwei kiwei ki seng sain pyrthei,” u la ong.

Haba bynrap ia kane, u President ka Meghalaya Pradesh Congress Committee (MPCC) uba dei ruh u MP barim ka Shillong u Bah Vincent H Pala u la ong, “Ngi la bteng ban iatreilang bad ka NPP tad haduh ki sngi ba la shim ia ka rai ia ka Amendment (jong ka Sixth Schedule) bad ka Parliamentary Committee ka la pdiang ia ka jingai jingmut ba la aiti da u Bah PN Syiem bad kiwei pat kiba dei na kiwei ki seng sain pyrthei ha ka jingialang bad ka Home Ministry ha Delhi.”

U Bah Pala u la pynpaw ruh ia ka jingsngew skhem ba ki paidbah ka Rilum Khasi bad Jaintia kin ai ka jingkyrshan ia ka Congress ha kane ka kynti kaba mynta, kata da kaba pynshong nongrim halor ka jingnoh synniang jong ka sha ki paidbah ka Jylla Meghalaya lyngba ka Sixth Schedule bad kiwei kiwei pat ki amendments/Bills. 

 “Ngi la shim ia ki nongrim, ngi tip ba ka NPP ka la shim noh ia ki MLA jong ngi bad ka la shim ia ki MDC jong ngi, hynrei ngi ong ia ki MLA lah ban shim mynta ka sngi hynrei lashai ngin ioh kham bun ki MDC bad kham bun ki MLA lada ngi ieng bad ki paidbah, ngi ieng bad ki jingshisha, ngi ieng da ka jingthmu ki jong ngi, da ka jingiohi jngai ka jong ngi,” u la bynrap.

Haduh mynta, ka Congress ka la dep ban pynbna haduh 42 ngut ki kyrtong ki ban mih ia aireng ha kane ka elekshon sha ka KHADC bad JHADC. Ia ka kyrteng jong u Bah Lawrence Nongrum ruh la pynbna mynta ka sngi kum u kyrtong na Nongpoh Constituency.

Nalor kata u Bah Pala u la ong ba ka party kan iakhun na ki 28 napdeng ki 29 tylli ki constituency hapoh KHADC. “Ngi lah lane ngim lah ban pynieng kyrtong na kawei ka seat namar haduh mynta ngim pat don ki nongpan tiket napoh Laban constituency.”

Katba ha kaba iadei bad ka Rilum Jaintia, u heh ka MPCC u la ong ba un khot pynlong ia ka jingialang ha ka thain ha ka 14 tarik Kyllalyngkot bad ki lah ban shim ia ka rai kaba khatduh ia ki kyrtong hapoh ka 15 lane 16 tarik. Haduh mynta la dep ban pynbna ia ki kyrteng jong ki 16 ngut ki kyrtong na ka bynta ka elekshon sha ka JHADC.