Sngew skhem u Myntri ba ka NPP kan jop kput ha kane ka by-election ha Gambegre

Syllad | The Rising MeghalayaNovember 1, 2024

U Nongialam ka NPP uba dei ruh u Myntri Sorkar u Rakkam A Sangma ha ka 31 tarik u Risaw u la pynpaw ia ka jingsngew skhem ba ka party kan ioh ia ka jingjop ha kane ka elekshon shiteng samoi ha Gambegre da kaba tam kput.

“Ka NPP kan jop kput bad kan thaw ruh ia ka rekod namar ka jingbteng jong ki paidbah ban wan aijingkyrshan ia ka party. Ki la sngewthuh namar ha u 2023 ka Gambegre ka la don ha u nombor uba bakla namar kim tip mano ban thaw ia ka Sorkar bad kumta ha ka jingbakla ki la kyrshan ia ka Congress bad u Saleng A Sangma u la hap shong ha ka liang pyrshah,” ong u Rakkam.

Ka kurim u Conrad K Sangma Myntri Rangbah ka Jylla, ka Dr Mehtab Chandee A Sangma ka dei ka kyrtong jong ka NPP bad kan iakhun pyrshah ia ki san ngut ki kyrtong kiba kynthup ia u Jingjang M Marak jong ka INC, ka Sadhiarani Sangma ka TMC, u Bernard N Marak na ka BJP bad arngut ki kyrtong shimet u Sengkrabirth M Marak bad Jerry A Sangma.

Haba pynpaw ba ka Gambegre ka la ioh ia ka kabu kaba biang tam, u MLA ka Rongara-Siju u la ong, “Ki lah ban jied ia u/ka MLA kiba ia don lang ha ka Sorkar. Ka dei ka dak kaba bha shibun. Nga la thikna shispah na ka shispah ba ka Dr Chandee kan ioh ia ka jingjop kaba donburom.”

U la ong ruh ba ki paidbah ka Gambegre kin vote ia ka NPP na ka bynta ka roi ka par jong ka constituency. Ki nongshong shnong ka Gambegre ki donkam ia ka roi ka par bad ki donkam ia ka jingkyrshan jong ka Sorkar. Ki donkam ia ki nongialam kiba lah ban pyniasoh bad pyniajan bad ka Sorkar. Nga tip ba ki paidbah ka Gambegre ki dei kiba stad ban jied ia la ki nongialam,” u la bynrap.

Nalor kata une u nongialam ka NPP u la ong ba ka lyer jong ka Congress kam don shuh ha Rilum Garo bad kan ym don jingktah ei ei ruh ha kane ka elekshon shiteng samoi ha Gambegre.

“Ka dei ka kam bah ba u Saleng u la jop namar ba ym shym la don ba khmih lynti ia kata, ba ki kam bah kin ym wan jia shuh na ka por sha ka por. Phin sa iohi ia ki sakhi satar na Gambegre, kane ka lyer kam don shuh,” u la bynrap.

U Rakkam u la ong ba ka rai jong ka BJP ban pyniasoh ha kane ka jingiakhun kan ktah jur bha ia ka Congress namar ba ki la iatreilang ha ka elekshon MP kaba la dep.

Ha kaba iadei bad ka kaiphod jingtohkit halor ka jingkynnoh jong ka TMC pyrshah ia ka NPP ba ka  donkti ha kaba sam ia ki tin sop iing sha ki nongshong shnong ha Gambegre ia kaba la lap ba kam long kaba shisha, na ka liang u Rakkam u la ong kiba kum kine ki jingkynnoh kin jia beit ha ka por elekshon.