Sngew skhem u nongialam ka BJP ban jop ka NPP na Shillong bad Tura parliamentary seat

Syllad | The Rising MeghalayaApril 26, 2024

U nongialam ka Seng BJP uba dei ruh u Myntri sorkar Jylla u Bah AL Hek u la pynpaw ia ka jingsngew skhem ba ka Seng National People’s Party (NPP) kan ioh ia ka jingjop na Shillong kumjuh napoh Tura parliamentary constituency.

Haba kren sha ki lad pathai khubor, u Bah Hek u la ong ba kane ka ilekshon Lok Sabha kaba dang shu dep ha Meghalaya ka la sakhi ia ka jingialeh hapdeng ki laitylli ki party, kata hapdeng ka NPP, Congress bad ka Voice of the People Party (VPP).

“Kat kiba jop kin tam tang khyndiat ka NPP kan jop na baroh ki artylli ki seat, kata napoh Shillong bad Tura parliamentary constituency” la ong bah Hek

Haba kylli, u Bah Hek u la ong, “Ka BJP ka la pynmih ia ka jingbthah kaba shai ha ryngkat ki jingpyntip sha baroh ki nongkitkam bad ki dkhot (karyakartas) jong ka party ba kin ai ka jingkyrshan kaba pura ia ka NPP, bad ruh ngi la iatreilang katkum ka jingbthah da ki nongialam ka BJP napoh central na ka bynta ban kyrshan ia ka NPP.”

“Kumno phin lah ban ong ba ngim lah ban pynkohnguh ia la ki nongkitkam bad ki dkhot? Ha ka jingshisha ngi la pynlong ia ki jingialang. Nga la khot pynlong haduh santylli ki jingialang hapoh ka mandal ka jong Nga lem bad kiwei pat ki constituency, bad Nga iohi ruh man ka sngi ba man ki mandal jong ka BJP ki pynlong ia ki jingialang jong ka party bad ialap na ka bynta ka NPP, kumta kumno phi lah ban ong ba ym shym la lah pynkohnguh ia ki,? ong u Bah Hek.

Nalor kata u la ong ruh, “Ngam don ei ei ban kren ha kaba iadei bad kiwei pat ki party sain pyrthei. Phi ong ba ka BJP bad ka NPP kim sngew skhem ban jop, hynrei ngi la trei shitom bad ngi sngew skhem ban ioh ia ka jingjop. U la ong ruh ba ka jingdon jong ki nongthep vote ha kane ka Jylla ka kiew bha haba ia nujor bad kiwei pat ki Jylla.”

Une u nongialam ka BJP u la ong ruh ba ka party ha ki snem ki ban wan kan pynieng la ki jong ki kyrtong na ka bynta ki ilekshon Lok Sabha ha ka Jylla.

Ka jingiakhun kaba jwat ia ka NPP, vote ki nongkyrshan TMC ia ka Congress ha Garo Hills: Rakkam

“Nga ong ba dei tang kane ka MP ilekshon 2024 kaba ngi aijingkyrshan ia ka NPP. Kane ka dei ban long ka sien kaba khatduh. Hadien ki (nongthep vote) kin hap ban vote tang ia ka BJP haba ki don ia la ki jong ki kyrtong kumno phin ong ia ki ban vote ia kiwei ki party sain pyrthei.”

Shuh shuh u la ong ba ki jingkynnoh kam bam sap pyrshah ia ka sorkar MDA ki dei tang ki kam leh politik ha ka por ilekshon. Une u nongialam ka BJP u la ong ruh, “Kumno phi kylli ia Nga ia kane ka jingkylli ba ka sorkar MDA ka dei kaba bamsap? Hato phi lah ban pynshisha ia kane? Dei tad lada phi lah ban pynshisha Ngam lah ban ong namar ia ki jingkynnoh dei ban wanrah ryngkat ki sakhi satar.”

Ha kawei pat ka bynta u Bah Hek u la pynpaw ka jingsngewkhia ha kaba iadei bad ka kam politik jong ka jingpyniashun briew kaba la wan jia ha kane ka ilekshon kaba la dep.