Sngewkhia jur ka JNC ba shah pynjulor ki bri kwai tympew ha ki shnong ki Khasi Pnar ha Assam

Syllad | The Rising MeghalayaSeptember 5, 2023

Ka Jaiñtia National Council (JNC) ka pynpaw ka jingsngewkhia kaba jur ha kaba iadei bad ka jingshah pynjulor ki bri kwai bri tympew hapoh ki shnong jong ki Khasi, Jaiñtia kiba la shong la sah da ki spah snem ha Pahar Line, Cachar District, Assam kaba la jia ha ka 30 tarik u bnai ba la dep hadien ka jingwan kyndang ka tnad Forest abd ki bor District  bad ki pulit ka Assam.

Ka JNC ka la ong ba kane ka jingleh jong ka sorkar Assam ka pyni ba kam burom satia ia ka jinglong trai jaka jong ki paradoh parasnam jong ngi kiba shong ba sah ha kitei ki shnong bad kiba la ri la sumar ia kitei ki jaka mynta lah palat shi spah snem.

Nalor kata ka JNC ka la ong ruh ba kine ki Khasi Pnar kiba shong ba sah ha kitei ki shnong ki la don naduh ka por jong ki phareng bad kim dei satia kiba shu wan buhai ha kitei ki jaka, bad lyngba ka histori ruh la sakhi shai ia kane.

Kyndang ka Tnat Forest ka Assam iaki Khasi Pnar na ki shnong Khasi ha Cachar Hills 

Lyngba une u kyrwoh ka JNC ka buh ruh ka jingkylli balei ba ka sorkar Meghalaya naduh kiba rim haduh kiba mynta kim ju nud ban iakren bad ka Sorkar Assam na ka bynta ban ai ia ka jingiada bad ka jingithuh ba kyrpang ia ki shnong Khasi,Jaiñtia kiba don hapoh Assam khnang ba kin lah ban long trai iala ka khyndew ka shyiap.

Kumta ruh na ka liang ka JNC ka kyntu jur ia ka sorkar jylla ba kan shimkhia ban iakren bad ka sorkar India halor ka jingleh donbor jong ka Sorkar Assam ia ki shnong Khasi, Jaiñtia kiba lah don hapoh Assam naduh shwa ka jinglaitluid jong ka Ri India, bad ban dawa ruh na ka sorkar India ban ai ka jingiada kaba kyrpang na ka bynta ka hok long trai halor ka khyndew ka syiap bad ban pynneh pynsah iala ka Riti ka Dustur jong ki Khasi,Pnar kiba shong shnong hapoh Assam.

Ha kajuh ka por ka JNC ka buh ruh ka jingkylli ia ka Sorkar Assam ba lada kiwei ki ritpaid kiba don hapoh Assam ki ioh ia ka  jingiada ba kyrpang ban long trai halor ka khyndew bad ban pynneh pynsah iala ki Riti ka Dustur,kan eh aiu ia ka Sorkar Assam ban ai ka juh ka jingiada ia ki riewlum rit paid Khasi, Pnar kiba don hapoh Assam.