Sngewkhia jur u MP ka Tura ba sahteng ki skhim MPLAD scheme mynta lah palat 22 snem ha ka Jylla

Syllad | The Rising MeghalayaNovember 5, 2024

U MP ka Congress na Tura u Saleng A Sangma u la pynpaw ka jingsngew sngewkhia kaba jur ha kaba iadei bad ka jingslem ban pyndep ia kiba bun bah ki skhim hapoh ka Members of Parliament Local Area Development Scheme (MPLADS) wat hadien ba la iaid palat 22 snem ha ka Jylla.

Hadien ka jingwan iashim bynta ha ka jingialang jong ka State Level Monitoring Committee (SLMC) ha ka 4 tarik u Naiwieng, u Saleng u la ong, “Ki don ki kam kiba dang sahteng naduh u snem 2002 kat haduh mynta. Nga pyrkhat balei ba wat hadien 20 snem ruh ki dang don ki kam kiba dang sahteng jong ka MPLADS, kata watla ka pisa ban pyntreikam ka dei kaba rit. Ngam tip ha kano ka rukom la pyntreikam. Haduh 22 snem kam dei ka kam kai.”

Katkum ka jingpynpaw ka jong u, u la ong ba ki katto katne ki kam kiba sahteng ki dei kiba la mang hapdeng ka T.50,000 haduh T.10 lak.

“Ngi la shong bishar bniah halor ki kam kiba dang sahteng bad u Chief Secretary u la bthah ia baroh ki Deputy Commissioner ban pynthikna ba dei ban pyndep noh ia baroh ki kam kiba dang sahteng hapoh jong une u bnai Nohprah u ban wan,” u la bynrap.

U Saleng u la pynpaw ba ka don ka project ka bym pat lah pyndep hapoh ka college ha Rongjeng. “Ki la pynlut kumba T.8.50 lak na ka T.10 lak hynrei ym pat shym la lah satia ban pyndep.”

Haba kylli ia ki daw jong ka jingslem ban pyndep ia ki project, u MP u la ong ba lehse ki MP kiba rim ki la ai kam sha ki briew ki bym dei, ki bym shym la lah ban pyntrei ia ki project.

Une u MP u la ong ruh ba ki don haduh 37 tylli ki skhim kiba la pyntrei hapoh ka MPLADS 2023-24 bad na kine, 28 tylli ki dei kiba la dep pyntrei bad 9 tylli kiba dang iaid shakhmat.

Da kaba pynpaw ba ka MPLADS ka dei ka skhim kaba rit bha, u Saleng u la ong, “Ka long tang ban shu pyndap ia ka jingduna ha kaba ki katto katne ki jaka ki bym ioh na kano kano ka skhim, kum ka nuksa PWD, PHE, Pule Puthi, Tnad Soil, kumta kita ki dei ki jingduna.Ka long tang T. 5 klur na ka bynta ka District baroh kawei.Ha ka constituency jong Nga ki don santylli ki District, ia kiba ngi hap ban peit ia ka thain baroh kawei bad nalor kata kam da heh than, hynrei watla katta ruh kan ai ka jingmyntoi ia ki paidbah nongshong shnong.”

Katkum ka kaiphod ba la ai da u DC -North Garo Hills, 30 na ki 54 tylli ki skhim la lah ban pyndep bad 24 tylli ki dei kiba dang iaid shakhmat, ha West Garo Hills – 404 ki skhim la pyndep bad 29 ki dang iaid shakhmat, South West Garo Hills 37 la pyndep bad 87 ki dang iaid, South West Khasi Hills 113 la pyndep 15 tylli ki dang iaid shakhmat, West Khasi Hills baroh ki 7 tylli ki skhim ki dang iaid shakhmat, South Garo Hills 9 tylli la lah ban pyndep bad 2 ki dang iaid shakhmat, East Garo Hills 25 la pyndep bad 1 ka dang iaid, East Khasi Hills 515 la lah ban pyndep bad 29 ki dang iaid shakhmat, Eastern West Khasi Hills 6 tylli la pyndep bad 10 ki dang iaid shakhmat, East Jaintia Hills 36 la pyndep bad 22 ki dang iaid shakhmat, Ri Bhoi 20 la pyndep bad 17 tylli ki dang iaid shakhmat.