Sngewkhia ka BJP ba shah pynhap ka Byrnihat kum ka jaka kaba jakhlia tam ha ka pyrthei

Syllad | The Rising MeghalayaMarch 13, 2025

Ka Seng BJP ka Jylla ka la pynpaw ka jingsngewkhia kaba jur halor ka kaiphod ba dang shen jong ka World Air Quality ba la leh da ka kompeni Swiss Air Technology kaba la pynhap ia ka Byrnihat kum ka jaka kaba jakhlia tam ha ka pyrthei.

Kane ka jingpynhap ka la wanrah ka jingkyndit kaba khraw ia ki nongshong shnong ka jylla Meghalaya kiba don ka jingsngewkhia bad kiba ialeh ban pynneh pynsah ia ka jingkhuid jingsuba jong ka mariang, kata ka jylla kaba ju pynpaw ruh ka jingsngew sarong ban don ha ka thup kaba hakhmat eh jong ka ri halor ka jingdon ia ki sawdong sawkun kiba khuid ba suba.

Lyngba u kyrwoh, u nongaiktien ba halor ka BJP u Bah Mariahom Kharkrang u la ong, “Kane ka dei ka jingmih kaba beit beit na ka jingtlot ha ki jingtreikam jong ki bor ka ain bad ka jingbym don ia ki policy kiba donkam ia ka mon sain pyrthei kaba khlain ban pyntreikam.”

“Ka jingkiew kaba khlem da plan bha, ki polisi ki bym treikam, ki kam pynroi ki bym shym la khmih bniah bad ka jingbym iohi jngai  ka la wanrah ia kane ka jingjah burom kaba khraw ia ka jylla jong ngi.Ngi khot mardor ia ka sorkar ba kan shim ia ki sienjam ban pynbha mardor, ban thaw ia ki plan kiba biang lyngba ki riew shemphang bad ban pyntreikam ia ki da kaba pyrkhing bha khnang ban lah ban weng ia kane ka jingeh bad khnang ba ka pateng ka ban wan kan ym iakynduh jingeh ha ka liang ka koit ka khiah,” u la bynrap.

U Bah Kharkrang u la ong ruh, “Ka sorkar ka dei ban sngewthuh ba ki kam pynroi kiba khlem da thmu bad plan bha bad kiba phai tang sha ki jingioh jingmyntoi ki wanrah ka jingma kaba khraw shuh shuh. Ka don ka jingthmu ban pynkylla ia ka Soil Conservation Training Institute sha ka jaka karkhana.Kane ka dei ka jingma kaba khraw. Kane ym tang ba kan nangpynsniew shuh shuh ia ka jinglong jingman ha ka thain Byrnihat, hynrei kan ktah jur ruh ia ki lynti iaid jong ki hati kiba kynriah jaka bad kaba lah ban lam sha ka jingshah ktah jong ki mrad ki mreng, ki jingthung jingtep kiba la shah ktah lypa bad ka jingiatyngkhuh hapdeng ki briew bad ki mrad.”

Kumta ruh ngi kyntu ia ka sorkar ba kan shimkhia halor kane ka kaiphod bad ban jied da kiwei pat ki jaka na ka bynta ki kam karkhana hadien ba la bishar bniah.