Sngewkhia ka HANM ba kiew dor ki marbam mardih

Syllad | The Rising MeghalayaJune 4, 2020

Ka Hynñiewtrep Achik National Movement (HANM) kala pynpaw ka jingsngewkhia kaba jur halor ka jingkiew dor ki marbam mardih haka jylla baroh kawei.

Ka HANM ha u kyrwoh bala phah da u general secretary u Shaniahlang Suchen, ula ong ba naduh ba sdang ka lockdown haduh mynta ki nongdie jingdie kila shim kabu shaba palat ban die iaki marbam mardih bad kala ktah iaki duk kiba suk, khamtam kiba im na kti ha ktien ban pyndap pynbiang iaki jingdonkam jong ki ha iing ha sem.

“Ka sorkar kala shu pynmih ki jingpynbna ban pynshitom ia kino kino kiba leh pyrshah bad die rem dor ia ki mar mata, pynban ha madan ki nongdie pat kila die palat iaka dor kaba la buh ka sorkar,” ong u Shaniahlang Suchen.

Ka HANM kala kyntu iaka sorkar ban shimkhia ban peit ia kane ka jingkiew dor ki mar ki mata ban myntoi u paidbah salorsar.

Ka HANM kala kynthoh ia kane ka sorkar kaba ialam u Myntri Rangbah kaba pynshlur tang iaka khaii dewiong bad ban kit dewiong nabar jylla ban pyndap pynbiang iaki kharkhana dewbilat ha East Jaintia Hills, kaba buh jingma na ka jingpur ka khlam naka jingwan rung ki bar jylla ban wanrah ia u khlam shapoh Disrict East Jaintia Hills, hynrei ia ka jingmyntoi u paidbah nongshong shnong ka jylla salonsar ka sorkar kam don jingkitkhlieh eiei ban peit.

Mynta pat ka sorkar kala ailad ban warah sa ki nongtrei bar jylla, kane ruh ka buh iaka jylla haka jingma bad la kyntu iaka sorkar ban pyrkhing bha bad ban pynbiang iaka jaka jurip iaka jingrung jingmih ki bar jylla khnang ban tem iaka jingpur u khniang COVID-19 sha kane ka Jylla baroh kawei.