Sngewkhia ka HNLC ia ka jingthmu barieh ka BJP lyngba ka mat ‘one nation, one election

Syllad | The Rising MeghalayaSeptember 1, 2023

Ka Hynniewtrep National Liberation Council (HNLC) ka pynpaw ka jingsngewkhia kaba jur halor ki jingthmu barieh jong ka Bharatiya Janata Party (BJP) ha kaba iadei bad ka jingtyrwa kaba iadei bad ka mat ‘one nation, one election,’(lane kawei ka ri’ ‘kawei ka ilekshon).

Ka HNLC ka la pynpaw ba kane ka dei ka jingthmu ban pynkylla ia ka India na ka ri synshar paidbah sha ka jingsynshar donbor lyngba ka niam, kata lyngba ki rukom pyrkhat kam ne ideology jong katkum ka Hindutva bad ban wanrah ia kata ka Hindu Rashtra.

Kala ong ruh ba kane ka long ban pynpaw pyrthei halor ki jingsngewkhia ba la rah da kiba bun ki party sain hima, ki kynhun sengbhalang bad da ki riew shimet halor ka jinglah ban shah ktah ha ki kam synshar khadar hapoh ka ri India.

Ka jingtyrwa ban pynlong kawei ka ri bad  kajuh ka rukom pynlong ia ki ilekshon ia kaba la tip kum kawei k ri ne ‘one nation, one election,’ ka la pynphai khmat namar ka jinglah ban shah ktah halor ka jingiapher ha ka rukom jong ki kam sain hima sima hapoh ka ri India. Ka jingsngewkhia ka long ruh ba kane ka jingthmu ka lah ban wanrah ka jingpyndonkam bor lyngba ka sorkar pdeng, ka jingpynduna ia ka jingmihkhmat bad ki kam kiba iadei bad ki regional party bad halor ki sur jong ki rit paid. Kumta ruh kane kan ktah ia ka jinglong mar ryngkat ha ka jingiashim bynta jong baroh ki nongshong shnong halor kam kiba iadei bad ka synshar paidbah.

Ka HNLC ha u kyrwoh lyngba u Bah Sainkupar Nongtraw, General Secretary ka shim ba kane ka jingtyrwa ia ka ‘one nation, one election’ ka lah ban long kum ka atiar ka ban kyntiew ia ki rukom pyrkhat kam jong ka Hindutva kaba thmu ban pynkylla ia ka ri India kum ka ri ki Hindu bad ka ban pynduh noh ia ki nongrim jong ka jingpdiang ia baroh ki jait niam ne secularism bad ka jingpdiang mar kumjuh da ka sorkar India.Ka jingsngewkhia ka long ruh halor ka synshar paidbah jong ka ri India bad halor ka jingiadei ia ki hok jong ki rit paid.

Ban pynpaw pyrshah halor kane ka jingthmu, ka long kaba donkam ban phaikhmat halor kumno la pynlong ia ka India namar kam dei kaba la pynshong nongrim lyngba ka niam, kata kumba la pynpaw ha ka Article 1 jong ki riti synshar khadar ne constitution jong ka ri India, kata ha kaba katkum ka histori ki jylla ba la synshar da ki syiem da ka mon sngewbha ki la wan ban pyniasoh.Watla katta lah ruh ban kdew ba katto katne ki jylla ki la shu shah khroh shah kjor bad shah pynbor ban soi iasoi ia ka Instrument of Accession lyngba ka jingshah pynap suloi.Kumta ruh halor kane ka nongrim ka donkam ban bishar bniah halor ka jingthmu ban pynlong ia kajuh ka rukom pynlong ia ka ilekshon namar kane ka jingiapher ha ki kam sain hima sima kiba katkum ka jinglong jingman jong ki jaka hapoh ka ri.

Katba kane ka jingthmu kaba don sha lyndet jong ka sorkar BJP ka dang dei ka mat ka ban dang iatai, hynrei kane ka wanrah ka jingsngewkhia kaba jur ha kaba iadei bad ka jingshah ktah jong ka synshar paidbah jong ka ri India bad ka jingiapher ha ka jinglong jingman jong ki kam sain hima katkum ki jaka jong ka ri.

Shuh shuh ka HNLC ka la ong ruh ba ka jingbanbor na ka liang ka sorkar pdeng bad ka jingpynduna ia ka jingmihkhmat jong ki party na ka thain bad ka jingshah banbor jong ki rit paid ka long kaba sngewkhia shibun.