Sngewkhia ka HYC ba iaid sahuh ki kali shalan mar beain sha Bangladesh

Syllad | The Rising MeghalayaJuly 22, 2020

Ka Hynniewtrep Youth Council (HYC) War Jaintia kala pynpaw ka jingsngewkhia kaba jur halor ka jingbym lah ki bor pulit jong ka East bad West Jaintia Hills District ban tem iaki kam khaii beain bad ban bat iaki kali kiba kit mar beain haka surok Amlarem-Muktapur, Dawki bad Khliehriat-Borkhat.

Ka HYC kala ong ba ka jingbymlah jong ki pulit bad khanglad iaki kali kala wanrah ka jingjyllei ka kam khaii beain haki shnong khappud ha India Bangladesh. Ka HYC kala kynnoh ruh ba kine ki briew kiba donkti ban khaii dei kiba don bor bad dei namar kane kim salia ban shalan iaki mar beain na India sha Bangladesh bad na Bangladesh sha India.

U President ka HYC War Jaintia u Yoodahun Shylla, ula iaroh iaka shnong VDP Muktapur kiba la ioh kurup bad bat ia ki briew kiba khaii supari ne kwai tyrkhong dangshen bad ula ong ba lada ki bor jong ka ain ruh ki shimkhia ban pynshitom kine briew kiba donkti ruh kim shlan ne nud ban leh kine ki kam beain.

Ka HYC ka pynrem jur ia kine ki nongkhaii beain kiba ym salia ban leh kine ki kam sniew wat ha kum kane ka por ka saw ka sain ba ka jylla ka iakhun na ka khlam COVID-19.

VDP apprehend five betel nuts smugglers along Indo-Bangla border

u Yoodahun Shylla ula pynpaw ruh iaka jinglyngngoh kumno kine ki mar beain ki iaid suk haka lynti syngkieng ha surok na Khliehriat sha ka thain Borkhat bad na Amlarem Muktapur bad kiwei kiwei ki shnong Khappud.

Ka HYC kala dawa na ka bor district kumjuh na ki pulit jong ki ar district ban shimkhia ban khanglad ia kane ka jingkhaii beain khnang ban the lakam ruh iaka jingsar ka khlam COVID-19 bad ba kan nym pur na ka jingkhaii beain sha ka thain Rilum Jaintia.