Sngewkhia ka HYC halor ka kam theh ñiut ha Mynkjai, kyntu iaki ar synjuk waheh chnong bad ki shnong ba pyrshah ban iakren pynbeit

Syllad | The Rising MeghalayaAugust 11, 2021

Ka HYC Jaintia Hill District kala pynpaw ba ka dap da ka jingsngewkhia ban iohi sha ki lad pathai khubor ba ka don ka jingbym ia sngewthuh jingmut hapdeng ki 6 shnong bad ka Synjuk Waheh Chnong Jowai halor ka jingleit theh ñuit ka Jowai Municipal Board sha Mynkjai.

Naka liang ka HYC kala ong “Kum kine ki kam ka dei ban don ka jingia phylliew jingmut bad ka jingiakren ba sani ban lait na kino kino ki kynrum kynram bad ki jingjia ba sngewsih hadien habud.”

Ka HYC ka kyntu bad kyrpad ia ki artylli ki Synjuk Waheh Chnong iaka Jowai bad War Jaintia bad ki waheh chnong ki 6 shnong ban pynbeit ia kane ka kam khnang ban pynjem iaka jingeh bad ban weng iaki saiteh saikhum halor ka kam bret ñiut ban tei iaka imlang ka sahlang.

Ka HYC kala kyntu ruh ia ka ophis u Deputy Commissioner, West Jaintia Hills District bad kumjuh ruh ia u Chief Executive Member Jaintia Hills Autonomous District Council (JHADC) ba ki dei ban long ksiang ban khot ban wer ia kine ki ar kynhun ba kin ia kren sngewthuh jingmut bad ban ia pynbeit noh ia kane ka kam namar ka jingpyrkhing ia wan ialeit na kawei ka shnong sha kawei pat kan nym poi sha eiei.