Sngewkhia ka MDC VPP halor ka jingpyni bym pyrwa ka EC jong ka JHADC halor ka Railway

Syllad | The Rising MeghalayaMarch 28, 2025

Ka MDC jong ka VPP na Narpuh Constituency ka Kong Deivipaya Tongper ka la pynpaw ia ka jingsngewkhia halor ka jingpyni bym pyrwa jong ka Executive Committee halor ka ishu  lynti rel ne railway ha Rilum Jaintia.

Ka Kong Tongper ka la pypaw ia katei ka jingsngewkhia jong ka halor ka jubab bala ioh na u Chief Executive Member jong ka JHADC U Ma Thombor Shiwat halor ka jingkylli jong ka ha kynta jingkylli bad jubab ha ka Dorbar mang tyngka jong ka JHADC kaba la long ha ka 27 tarik u bnai Lber mynta u snem.

Haba jubab ia ka jingkylli jong ka Kong Tongper, u Ma Shiwat u la ong ba haduh mynta ka Council kam pat shym la ai kano kano ka NOC ne jingbit ia kano kano kompany ne kynhun treikam na ka bynta ban leh ia ka survey na ka bynta ka lynti iaid ka rel ha Rilum Jaintia. Ka Kong Tongper ka la kylli hato ka Executive Committee kan kyntait ne pdiang ia ka rel ha Rilum Jaintia bad na ka liang jong u Ma Shiwat u la jubab ba kin sa peit da la poi kata por bad kane ka jubab jong u Ma Shiwat kam la pynhun iaka ka Kong Tongper.

Ha kawei pat ka liang, u Executive Member jong ka JHADC u Ma J Suiam u la iathuh ba ki don haduh 5926 ngut ki nongtrei bar jylla kiba la ioh ia ka Non-Tribal Employees Service License na ka Council naduh ka 1 tarik u bnai Iaiong 2022 haduh 28 tarik u bnai Rymphang 2025 haba jubab ia ka jingkylli bala wanrah da u MDC ka VPP na Muthlong Sohkymphor u Ma Soki Lapasam. Utei u MDC ka VPP u la kylli balei la shu thoh tang nongtrei bylla ne labour bad nongtrei ne employee khlem da thoh shai ia ka jait kam ha kita ki labour laisen. Halor kane ka jingkylli u Ma Shiwat u la jubab da kaba kubur ba ka don ka jingduna ha katei ka labour laisen bad u la kular ba nangne sha khmat yn sa thoh shai noh ia ka jait kam ba ki trei ki nongtrei bar jylla ha ki labour laisen.

Haba jubab ia ka jingkylli jong u Ma Lapasam halor ka jingioh bhah jong ka Council na ka 15 Finance Commission ha u snem 2023-24 bad 2024-25, U Deputy Chief Executive Member u Ma Lasky Rymbai u la iathuh ha u bnai Nohprah 2024 ka Council ka la iohpdiang ia ka pisa 4.05 klur tyngka kum ka first instalment jong ka Untied Grant 2021-22. U Ma Lapasam u la kylli kumno hato la sam lut sha baroh ki MDC bad halor kane ka jingkylli u Ma Rymbai u la jubab ba la sam ia katei ka pisa sha baroh ki MDC jong ka JHADC.

Marsien ioh ia katei ka jubab, u MDC jong ka VPP na Jowai North Constituency u Ma A Andrew Shullai u la ieng bad pynpaw ba kum u MDC barim jong ka Council um shym la ioh bhah satia namar la shu sam sop sop ia katei ka skim bad u la buh jingkylli hato mynta u snem yn sam sop sop ne yn sam ia baroh ki MDC jong ka Council. U Ma Rymbai u la jubab ba yn sam ia baroh ki MDC bad katkum ka projek ba kin phah sha ka Council.

Haba jubab ia ka jingkylli jong u MDC ka VPP na Mukhla Ummulong Constituency u Ma Nehimaia Lamare halor ka tulop ba dang sah ban siew ia ki nongtrei bad MDC jong ka JHADC, u Ma Shiwat u la iathuh ba ka tulop kaba dang sah ban siew ka poi haduh 51 klur tyngka.

U MDC jong ka VPP na Muthlong Sohkymphor Constituency u la kylli katno tylli ki skul District Council Lower Primary School (DCLPS) ki don baroh bad hato kine baroh ki skul ki don ia ka iing skul jong la jong, ki biang ka painkhana bad um dih bad hato ka jingdon jong ki nonghikai ki long ne em katkum ka kyndon jong Rights to Education Act kata iwei nonghikai na bynta 30 ngut ki khynnah pule ne ki don ki skul kiba bun khynnah bad duna nonghikai ne bun nonghikai bad duna khynnah.

Haba jubab ia katei ka jingkylli jong u Ma Lapasam, ka Executive Member kong Violet Lyngdoh ka la iathuh ba ki don haduh 101 tylli ki DCLPS bad na kitei 51 tylli ki don iaka iing skul katba 49 tylli ki long ki skul ha ki Dorbar Hall bad ka la iathuh shuh shuh ba baroh ki skul ki biang ki jingdonkam na bynta ki nonghikai bad khynnah. Ka Kong Lyngdoh ka la kular ban shim ia ki lad ki lynti ban nang pynbha ia ki DCLPS.